America : అమెరికా లాస్ వెగాస్ లో ఓ అపార్ట్ మెంట్ లో సోమవారం అర్ధరాత్రి కాల్పులు జరిగాయి. స్థానికుల సమాచారంతో రంగంలోకి దిగిన పోలీసులు.. ఘటనా స్థలానికి చేరుకున్నారు. ఈ కాల్పుల్లో ఇద్దరు మహిళలు మృతి చెందినట్లు మొదట గుర్తించారు. లోపలికి వెళ్లి చూడగా పోలీసులకు 13 ఏండ్ల బాలిక తుపాకీ గాయాలతో కొట్టుమిట్టాడటం గమనించారు. వెంటనే ఆ బాలికను ఆసుపత్రికి తరలించారు. సమీపంలోని మరో అపార్ట మెంట్ లో ఇద్దరు మహిళలు, ఓ యువకుడి డెడ్ బాడీని పోలీసులు గుర్తించారు. దుండగుడి కాల్పుల్లో మొత్తం ఐదుగురు మరణించినట్లు పోలీసులు నిర్ధారించారు.
కాగా, కాల్పులు జరిపిన నిందితుడు సమీపంలో ఉన్నట్లు స్థానికులను పోలీసులు అలర్ట్ చేశారు. నిందితుని కోసం పోలీసులు గాలింపు జరపగా మంగళవారం ఉదయం ఓ దుకాణం దగ్గరలో కనిపించాడు. పోలీసులు అక్కడికి చేరుకొని దుండగుడు పరిగెత్తాడు. తుపాకీ విడిచిపెట్టి లొంగిపోవాలని కోరినప్పటికీ అతను నిరాకరించాడు. చివరికి తనను తానే కాల్చుకుని ఆత్మహత్య చేసుకున్నట్లు పోలీసులు వెల్లడించారు. అయితే కాల్పులకు సంబంధించిన కారణాలు మాత్రం తెలియరాలేదు.
