Drink Benefits : మద్యపానం ఆరోగ్యానికి హానికరం అని ప్రత్యేకంగా చెప్పనవసరం లేదు. ఆల్కహాల్ వల్ల మనిషి ఆరోగ్యానికి హాని కలుగుతుందన్న సంగతి అందరికీ తెలిసిందే. కానీ కొంత మంది మాత్రం పెగ్గుల మీద పెగ్గులు లాగిస్తుంటారు. కానీ ప్రస్తుత కాలంలో ఆల్కహాల్ తీసుకోవడం కామన్ అయిపోయింది. ఆఫీసు పార్టీల్లోనూ మందు సేవించడం అలవాటుగా వస్తోంది.
ప్రపంచ వ్యాప్తంగా మారుతున్న వర్క్ కల్చర్, ఇతర దేశాల ప్రభావం వల్ల భారత్ లోనూ మద్యం వినియోగం పెరుగుతోంది. సోషల్ డ్రింక్ పేరుతో కొందరు మద్యాన్ని స్టేటస్ సింబల్ గా భావిస్తున్నారు. మరి కొందరు రోజుకి ఒక్క పెగ్ తాగడం ఆరోగ్యానికి మంచిదే అని అంటున్నారు. అయితే నిజంగానే రోజూ ఒక పెగ్ తీసుకోవడం ఆరోగ్యకరమా ? ప్రపంచ ఆరోగ్య సంస్థ ఏం చెబుతోంది? తెలుసుకుందాం.
ఒక వ్యక్తి రోజుకు ఎంత ఆల్కహాల్ తీసుకోవచ్చన్న దానిపై ప్రపంచ ఆరోగ్య సంస్థ (WHO) ఓ నివేదికను విడుదల చేసింది. ఈ సంస్థ ప్రకారం రోజుకు ఒక పెగ్ కూడా తీసుకోవడం ఆరోగ్యానికి మంచిది కాదని తేల్చి చెప్పింది. అసలు మద్యం సేవించడం ఆరోగ్యానికి ఏ విధంగానూ మంచిది కాదని నిపుణులు చెబుతున్నారు. రోజుకు ఒక పెగ్ ఏం కాదన్న దాంట్లో ఎలాంటి శాస్త్రీయ ఆధారాలు లేవని నివేదికలో పరిశోధకులు తెలిపారు.
ప్రపంచ ఆరోగ్య సంస్థ ప్రకారం.. మద్యం సేవించడం వల్ల క్యాన్సర్, లివర్ ఫెయిల్యూర్ వంటి సమస్యల ప్రమాదం గణనీయంగా పెరుగుతుంది. గుండె సంబంధిత వ్యాధులకు మద్యపానమే కారణమని కూడా ఆరోగ్యనిపుణులు హెచ్చరిస్తున్నారు. ఆల్కహాల్ అనేది ఒక రకమైన విషపూరితమైన పదార్ధం. ఇది శరీరానికి తీవ్రమైన హాని కలిగిస్తుంది. ఇంటర్నేషనల్ ఏజెన్సీ ఫర్ రీసెర్చ్ ఆన్ క్యాన్సర్ కొన్ని సంవత్సరాల క్రితం గ్రూప్ 1 కార్సినోజెన్‌లో ఆల్కహాల్‌ను జోడించింది. ఆస్బెస్టాస్, రేడియేషన్, పొగాకు కూడా ఈ ప్రమాదకరమైన సమూహంలో చేర్చబడ్డాయి. ఈ నివేదిక ప్రకారం ఆల్కహాల్ గుండె జబ్బులు, టైప్ 2 డయాబెటిస్‌కు మంచిదని చెప్పేందుకు ఎటువంటి ఆధారాలు లేవని డాక్టర్లు చెబుతున్నారు.
