Divorce : భార్యాభర్తల మధ్య విభేదాలు వచ్చినప్పుడు విడిపోవడం సహజం. ఇద్దరి మధ్య అనుబంధం కొనసాగడం సాధ్యం కాదని భావించి విడాకుల కోసం దరఖాస్తు చేసుకుంటారు. పరస్పర అంగీకారంతో ఈ వ్యవహారం కొన్నిసార్లు ఈజీ అయిపోతుంది. అయితే విడాకులకు సంబంధించిన కొన్ని షాకింగ్ కేసులు గతంలో చాలా వెలుగులోకి వచ్చాయి. తాజాగా వెలుగులోకి వచ్చిన విడాకుల కేసు పలువురిని ఆలోచింపజేసింది. అసలు విషయం ఏమిటంటే..
ఉత్తరప్రదేశ్‌లోని ఆగ్రాలో పెళ్లి అయిన 40 రోజులకే తర్వాత భర్త నుంచి విడాకులు తీసుకోవాలని కోర్టు మెట్లు ఎక్కింది ఓ భార్య. ఇక్కడ ఆమె విడాకుల కోసం చెప్పిన కారణం తెలిస్తే అవాక్కవ్వాల్సిందే. తన భర్త రాజేష్ 40 రోజుల్లో ఆరుసార్లు మాత్రమే స్నానం చేశాడని, దీంతో అతడి శరీరం నుంచి దుర్వాసన తట్టుకోలేకపోయానని చెప్పింది. అంతేకాదు వారానికోసారి పవిత్రంగా భావించే గంగాజలాన్ని చల్లుకుంటాడని… ఇక అతడితో కలిసి జీవించడం తన వల్ల కాదని కోర్టును ఆశ్రయించింది.
పెళ్లయిన నాటి నుంచి బలవంతంగా చేయించినా ఆరుసార్లు మాత్రమే స్నానం చేశాడు. దీంతో రాజేష్ భార్య కుటుంబ సభ్యులు ఆమె భర్త రాజేష్ పై వరకట్న వేధింపుల కేసు నమోదు చేసి విడాకులు ఇవ్వాలని డిమాండ్ చేశారు. అయితే ఫ్యామిలీ కౌన్సెలింగ్ తర్వాత రాజేష్ శుభ్రంగా ఉండేందుకు రోజూ స్నానం చేసేందుకు అంగీకరించాడు. కానీ ఆ స్త్రీ అతనితో ఉండడానికి ఇష్టపడడం లేదు. దీంతో మరోసారి సెప్టెంబర్ 22న కౌన్సెలింగ్‌కు రావాల్సి ఉంటుందని అధికారులు వెల్లడించారు. ఇలాంటి అరుదైన కేసులు నమోదు కావడం ఇదే మొదటిసారి కాదు. ఇటీవల కుర్ కురే ప్యాకెట్ ఇవ్వలేదని భర్త విడాకులు కోరిన ఘటన ఇటీవల ఆగ్రాలో జరిగిన సంగతి తెలిసిందే.
