American Woman : పబ్ జీ ప్రేమలో పడి భారత్ కు వచ్చిన పాక్ మహిళ సీమా హైదర్ తరహాలోనే మరో ప్రేమకథ వెలుగులోకి వచ్చింది. అమెరికాలోని ఫ్లోరిడా నుంచి ఉత్తర్ ప్రదేశ్ కు వచ్చిన యువతిని ఇటావా పోలీసులు అదుపులోకి తీసుకున్నారు. ఫ్లోరిడాకు చెందిన బ్రూక్లిన్ (30) అనే యువతికి ఇటావా యువకుడు హిమాన్షు యాదవ్ తో పబ్ జీ ఆట ద్వారా పరిచయం పెరిగి ప్రేమగా మారింది. హిమాన్షు కోసం కొన్ని నెలల క్రితం ఆమె చండీగఢ్ కు చేరుకొంది. ఆమెను కలుసుకోవడానికి హిమాన్షు కూడా చండీగఢ్ వెళ్లాడు. ఆమెను అక్కడే పెళ్లాడి, కొద్ది రోజులు గడిపిన తరువాత ఇటావాకు తీసుకొచ్చాడు. స్థానికులు అనుమానించి పోలీసులకు సమాచారం అందించారు.
దీంతో తిరిగి చండీగఢ్ వెళ్లిపోయేందుకు ఇద్దరూ ఆర్టీసీ బస్సు ఎక్కారు. ముందస్తు సమాచారంతో బస్సు డ్రైవరు నేరుగా పోలీస్ స్టేషనుకు తీసుకువెళ్లాడు. పోలీసులు బ్రాక్లిన్, హిమాన్షులను అదుపులోకి తీసుకొని విచారించారు. ఆ యువతి పూర్తి అంగీకారంతోనే హిమాన్షుతో కలిసి చండీగఢ్ వెళ్లాలనుకుంటోందని రూరల్ ఎస్పీ విజయ్ సింగ్ చెప్పారు.
