AP Govt : కేంద్రం ఏపీకి శుభవార్త చెప్పింది.. కొత్తగా చేనేతల కోసం 10 క్లస్టర్లను మంజూరు చేసింది. చేనేతలను ప్రోత్సహించే దిశగా ఈ మేరకు క్లస్టర్లను మంజూరు చేశారు. అలాగే కేంద్రం నిధుల్ని కూడా విడుదల చేసింది. రాష్ట్రంలోని పదిచోట్ల ఈ క్లస్టర్లను ఏర్పాటు చేయనున్నారు. రాష్ట్రంలో చేనేతలకు లబ్ధి కలిగేలా ఏపీ ప్రభుత్వం అడుగులు వేస్తోంది.. వారిని ప్రోత్సహించే దిశగా అనేక కార్యక్రమాలను చేపట్టింది.
ఆంధ్రప్రదేశ్కు కేంద్రం తీపికబురు చెప్పింది.. కొత్తగా రాష్ట్రానికి 10 చేనేత క్లస్టర్లను మంజూరు చేసింది. చేనేత కార్మికుల్ని ప్రోత్సహిస్తూ.. కొత్త డిజైన్ల ద్వారా ఆదాయం పెంచందుకు కేంద్రం క్లస్టర్ల కార్యక్రమాన్ని తీసుకొచ్చింది. ఈ మేరకు ఏపీలోని కాకినాడ, తూర్పుగోదావరి, గుంటూరు, బాపట్ల, పల్నాడు, నెల్లూరు, శ్రీసత్యసాయి, అనంతపురం ఒక్కొక్కటి.. తిరుపతి జిల్లాలో మాత్రం రెండు క్లస్టర్ల ఏర్పాటుకు రాష్ట్ర ప్రభుత్వం కేంద్రానికి ప్రతిపాదనల్ని పంపింది. ఈ మేరకు కేంద్రం ఆమోదం తెలిపింది.
అంతేకాదు పల్నాడు, గుంటూరు, బాపట్ల, తిరుపతి పరిధిలో క్లస్టర్ల ఏర్పాటుకు సంబంధించి తొలి అడుగు కూడా పడింది. ఈ క్లస్టర్ల కోసం తొలి విడతగా రూ.5కోట్లు విడుదలయ్యాయి. మిగిలినవాటికి మరో రూ.2కోట్ల మంజూరుకు ఉత్తర్వులు జారీ అయ్యాయి. ఈ నిధులు 10 రోజుల్లో రాష్ట్రానికి జమకానున్నాయి.. సంక్రాంతి నాటికి క్లస్టర్ల ఏర్పాటుకు సంబంధించి పనులు ప్రారంభించనున్నారు. ఈ క్లస్టర్ల ఏర్పాటుతో 2వేలమంది చేనేతలకు లబ్ధి కలుగుతుందని చెబుతున్నారు.
