Thalliki Vandanam : విద్యార్థులకు సంబంధించిన పథకాలను అమలు చేసేందుకు ప్రభుత్వం సిద్ధంగా ఉంది. పేదరికం కారణంగా ఏ పిల్లవాడు చదువుకు దూరమవ్వకూడదనే ఉద్దేశ్యంతో ఆంధ్రప్రదేశ్ ప్రభుత్వం ‘తల్లికి వందనం’, ‘స్టూడెంట్ కిట్’ అనే సంక్షేమ పథకాలను ప్రారంభించనుంది. ఈ వినూత్న పథకం తల్లులు తమ పిల్లలను క్రమం తప్పకుండా పాఠశాలకు పంపడంలో తోడ్పడుతుందని.. విద్యార్థుల డ్రాపౌట్ రేటును గణనీయంగా తగ్గించగలదని అధికారులు భావిస్తున్నారు. ఈ మేరకు ప్రభుత్వం కీలక ఉత్తర్వులు జారీ చేసింది. రాష్ట్రంలో 1 నుంచి ఇంటర్మీడియట్ వరకు చదువుతున్న విద్యార్థులు ‘తల్లికి వందనం’, ‘స్టూడెంట్ కిట్’ ప్రయోజనాలను పొందేందుకు ఆధార్ కలిగి ఉండాలని, లేని పక్షంలో నమోదుకు దరఖాస్తు చేసుకోవాలని ప్రభుత్వం సూచించింది. ఆధార్ లభించే వరకు 10 రకాల డాక్యుమెంట్లను పరిశీలిస్తామని వెల్లడించారు. ఈ మేరకు పాఠశాల విద్యాశాఖ కార్యదర్శి కోన శశిధర్ ఉత్తర్వులు జారీ చేశారు.
‘తల్లికి వందనం’ పథకం కింద దారిద్య్రరేఖకు దిగువన ఉన్న తల్లులు లేదా సంరక్షకులకు, వారి పిల్లలను పాఠశాలలకు పంపే వారికి సంవత్సరానికి రూ.15,000 ఆర్థిక సహాయం అందించబడుతుంది. విద్యార్థులకు 75 శాతం హాజరు తప్పనిసరి అని అధికారులు తెలిపారు. ప్రభుత్వ, ఎయిడెడ్ పాఠశాలల్లో చదువుతున్న విద్యార్థులకు స్టూడెంట్ కిట్ కింద పాఠ్యపుస్తకాలు, నోట్ పుస్తకాలు, వర్క్ బుక్లు, ఇంగ్లీషు డిక్షనరీ, బ్యాగ్, బెల్ట్, మూడు జతల యూనిఫాం దుస్తులు, ఒక జత బూట్లు, రెండు జతల సాక్స్లు అందజేయనున్నారు. ఈ రెండు పథకాల కింద ప్రయోజనం పొందేందుకు ఆధార్ తప్పనిసరి. ఎవరికైనా లేని పక్షంలో విద్యాశాఖ ద్వారా ఆధార్ నమోదు సౌకర్యం కల్పించాలని సూచించారు.
ఆధార్ వచ్చే వరకు విద్యార్థుల తల్లిదండ్రుల ఓటరు గుర్తింపు కార్డు, కిసాన్ పాస్బుక్, ఉపాధి పథకం కార్డు, రేషన్ కార్డు, పాస్పోర్ట్, బ్యాంక్ లేదా డ్రైవింగ్ లైసెన్స్, పోస్టల్ పాస్బుక్, వ్యక్తిని ధృవీకరించే గెజిటెడ్ అధికారి సంతకంతో కూడిన పత్రం, ఒక పత్రం. తహసీల్దార్ జారీ చేసిన, శాఖ సూచించిన ఏదైనా పత్రం అనుమతించబడుతుంది. పూర్తి విధానాలతో కూడిన ఉత్తర్వులను ఆంధ్రప్రదేశ్ ప్రభుత్వం త్వరలో విడుదల చేయనుంది. ప్రస్తుతం తల్లికి వందనం పథకానికి సంబంధించి ఆధార్ వెరిఫికేషన్ కు సంబంధించి ఉత్తర్వులు జారీ అయ్యాయి.
