Trump VS Indian Students : అమెరికా అధ్యక్షుడు డొనాల్డ్ ట్రంప్ ఇమ్మిగ్రేషన్ విధానాల కింద విదేశీ విద్యార్థుల వీసాల రద్దు నిర్ణయం వివాదాస్పదంగా మారింది. ఈ నేపథ్యంలో, ముగ్గురు భారతీయ విద్యార్థులు న్యూహాంప్‌షైర్ ఫెడరల్ కోర్టులో పిటిషన్ దాఖలు చేశారు. హోంలాండ్ సెక్యూరిటీ విభాగం ఎలాంటి స్పష్టమైన కారణాలు చెప్పకుండానే తమ ఎఫ్-1 వీసాలను రద్దు చేసిందని వారు ఆరోపించారు.
కొన్ని నెలల్లో విద్యా కార్యక్రమాలు పూర్తి కాబోతున్న తరుణంలో ఈ ఆకస్మిక నిర్ణయం తమ విద్యా భవిష్యత్తును ప్రమాదంలోకి నెట్టిందని విద్యార్థులు వాదిస్తున్నారు. ఈ న్యాయపోరాటంలో భారతీయ విద్యార్థులతో పాటు కొందరు చైనా విద్యార్థులు కూడా చేరారు. అమెరికన్ సివిల్ లిబర్టీస్ యూనియన్ (ACLU) వీరికి మద్దతుగా నిలిచి, వీసా రద్దు నిర్ణయాలు న్యాయపరమైన ప్రక్రియ లేకుండా జరిగాయని వాదిస్తోంది.
ఈ చర్యలు విద్యార్థుల హక్కులను కాలరాస్తున్నాయని, విద్యా సంస్థల్లో అన్యాయంగా టార్గెట్ చేస్తున్నాయని ACLU ఆందోళన వ్యక్తం చేసింది. ఈ కేసు అమెరికాలో విదేశీ విద్యార్థుల భవిష్యత్తుపై గణనీయమైన ప్రభావం చూపే అవకాశముందని నిపుణులు అభిప్రాయపడుతున్నారు.
