Infosys Jobs : దిగ్గజ ఐటీ కంపెనీ ఇన్ఫోసిస్ 2026 ఆర్థిక సంవత్సరంలో 20వేల మందికి పైగా ఫ్రెషర్లను నియమించుకోవాలని భావిస్తోంది. ఇటీవల కాలంలో ఐటీ తిరిగి పుంజుకుంటున్న నేపథ్యంలో కొత్త నియమకాలను చేపట్టేందుకు రెడీ అవుతోంది.
2025లో 15వేల మంది ఫ్రెషర్లను నియమించుకోవాలని భావిస్తున్నట్లు కంపెనీ ప్రతినిధులు పేర్కొన్నారు. ఇక 2026లో ఈ సంఖ్యను మరింత పెంచాలని భావిస్తున్నట్లు వెల్లడించారు. ఈ నియామకాలు ఆన్-క్యాంపస్, ఆఫ్-క్యాంపస్ డ్రైవ్‌ల ద్వారా జరుగనున్నాయి.
కాగా 2024లో కేవలం 11,900 మంది ఫ్రెషర్లను నియమించిన ఇన్ఫోసిస్, ఇప్పుడు ఐరోపా, ఫైనాన్షియల్ సర్వీసెస్, మాన్యుఫాక్చరింగ్ రంగాల్లో పెరిగిన డిమాండ్‌తో ఈ సంఖ్యను గణనీయంగా పెంచుతోంది. ఈ నిర్ణయం ఇంజనీరింగ్ గ్రాడ్యుయేట్లకు, ముఖ్యంగా నిరుద్యోగ సమస్యను ఎదుర్కొంటున్న యువతకు భారీ ఉపశమనం కలిగిస్తుంది.
ఇకపోతే ఇన్ఫోసిస్ అభ్యర్థులను ఆన్‌లైన్ టెస్ట్‌లు, టెక్నికల్, హెచ్‌ఆర్ ఇంటర్వ్యూల ద్వారా ఎంపిక చేస్తుంది. అర్హత కోసం 10వ తరగతి, ఇంటర్మీడియట్‌లో 60%, బీటెక్‌లో 65% మార్కులు, ఎటువంటి బ్యాక్‌లాగ్‌లు లేకపోవడం తప్పనిసరి. ఆసక్తి ఉన్నవారు ఇన్ఫోసిస్ అధికారిక వెబ్‌సైట్ (www.infosys.com) ద్వారా దరఖాస్తు చేసుకోవచ్చు.
