Actor Darshan : ఇప్పటికే అభిమానిని హత్య చేసిన కేసులో ఇరుక్కున్న దర్శన్.. ఇప్పుడు ఆయన మేనేజర్ ఒకరు ఆత్మహత్య చేసుకోవడంతో ఇబ్బందులను ఎదుర్కొంటున్నాడు. కన్నడ నటుడు దర్శన్ తూగుదీపకు చెందిన బెంగళూరు ఫామ్ హౌస్ ను చూసుకునే మేనేజర్ శ్రీధర్ ఆత్మహత్యకు పాల్పడ్డాడు. అతని మృతదేహాన్ని ఫామ్ హౌస్ సమీపంలో పోలీసులు స్వాధీనం చేసుకున్నారు. అక్కడే సూసైడ్ నోట్ తో పాటు వీడియో సందేశం పోలీసులకు లభించాయి.
విపరీతమైన ఒంటరితనం కారణంగానే చనిపోతున్నట్లు సూసైడ్ నోట్ లో మేనేజర్ శ్రీధర్ పేర్కొన్నాడు. ఈ కేసులో తన మిత్రులు, బంధువులకు ఎలాంటి సంబంధం లేదని, తన మరణానికి తానే కారణమని సూసైడ్ నోట్ లో రాసుకున్నాడు. అయితే మేనేజర్ ఆత్మహత్యకు, దర్శన్ అభిమాని రేణుకాస్వామి హత్య కేసుకు మధ్య ఉన్న సంబంధంపై పోలీసులు ఆరా తీస్తున్నారు.
ఈ కేసులో ఇప్పటికే దర్శన్, ఆయన ప్రియురాలు పవిత్ర గౌడను పోలీసులు అరెస్టు చేశారు. ప్రస్తుతం ఈ కేసును బెంగళూరు పోలీసులు దర్యాప్తు చేస్తున్నారు. హత్య జరిగిన ప్రదేశంలో దర్శన్ కారు కనిపించడంతో పోలీసులు అతన్ని నిందితుడిగా చేర్చారు. ప్రస్తుతం ఈ కేసులో పవిత్ర గౌడ, దర్శన్ పోలీసుల కస్టడీలో ఉన్నారు.
