Superstar Krishna : మహేష్ బాబు ఈ పేరుతో ప్రత్యేకంగా పరిచయం అక్కర్లేదు. బాలనటుడిగా వెండితెరకు ఎంట్రీ ఇచ్చి ప్రస్తుతం సూపర్ స్టార్ గా వెలుగొందుతున్నారు. ఆయన ఇక్కడి వరకు రావడానికి కారణం కథల ఎంపిక లో మహేష్ జడ్జిమెంట్ పర్ఫెక్ట్ గా ఉండడమే కారణం. కెరీర్ మొదట్లో తన తండ్రి కృష్ణ తోడ్పాటు ఉన్నప్పటికీ ఆ తర్వాత మహేష్ తానే సొంతంగా కథలు వినడం ప్రారంభించారు. ఒక్కడు చిత్రంతో స్టార్ డమ్ సంపాదించుకున్న మహేష్ పోకిరి చిత్రంతో ఇండస్ట్రీ రికార్డులను బద్ధలుకొట్టి టాలీవుడ్ సూపర్ స్టార్ గా ఎదిగారు.
త్వరలో మహేష్ బాబు రాజమౌళి దర్శకత్వంలో పాన్ వరల్డ్ సినిమాలో నటించబోతున్న సంగతి తెలిసిందే. మహేష్ బాబు సాధించిన ప్రతి విజయాన్ని తండ్రిగా సూపర్ స్టార్ కృష్ణ గర్వపడుతూ వచ్చారు. మహేష్ నటించిన చిత్రాల రికార్డులని కృష్ణ స్వయంగా చెప్పుకుని ఆనందపడేవారు. అంత బాగా మహేష్ సక్సెస్ ని కృష్ణ గుర్తు పెట్టుకున్నారు. అదే విధంగా మహేష్ ఏదైనా ఫ్లాప్ సినిమాలో నటిస్తే కృష్ణ తన ఒపీనియన్ ఓపెన్ గా చెప్పేవారు. ఉదాహరణకి మహేష్ నటించిన నాని చిత్రం కృష్ణకి నచ్చలేదు. ఈ సినిమా విడుదలకు ముందే కృష్ణ ఆ విషయం చెప్పారు. ఈ సినిమా కనుక హిట్ అయితే మహేష్ స్టార్ హీరో కాలేడని ఓపెన్ గా చెప్పేశాడు.. అంటే స్టార్ హీరోలు ఇలాంటి చిత్రాల్లో నటించకూడదనేది కృష్ణ ఒపీనియన్.
అదే విధంగా ఆయన నటించిన కొన్ని సినిమాలకు మిక్స్డ్ టాక్ వచ్చినప్పటికీ లేదు ఈ సినిమా బావుందని కృష్ణ చెప్పిన సందర్భాలు కూడా ఉన్నాయి. సర్కారు వారి పాట చిత్రం విడుదల అయినప్పుడు మిక్స్డ్ టాక్ వచ్చింది. ఈ చిత్రం గురించి కృష్ణ ఓ ఇంటర్వ్యూలో మాట్లాడుతూ… సర్కారు వారి పాట చిత్రం ఫ్లాప్ అంటే తాను ఒప్పుకోనని ఖరాకండీగా చెప్పేశారు. సినిమా చాలా ఎంటర్టైనింగ్ గా ఉంది. ఒక యూనిక్ విషయాన్ని ఈ చిత్రంలో చూపించారు.
ఈ చిత్రంలో చూపించిన బ్యాంకింగ్ వ్యవస్థ గురించి సుప్రీం కోర్టులో కూడా చర్చ జరుగుతోందని ఆయన అన్నారు. పోకిరి, దూకుడు సినిమాల కంటే ఈ చిత్రంలో మహేష్ బాబు పెర్ఫామెన్స్ చాలా ఎనెర్జిటిక్ గా ఉందన్నారు. సినిమా విడుదలైన అన్ని థియేటర్లలో ఆడియన్స్ బాగా ఎంజాయ్ చేస్తున్నారు అని కృష్ణ అన్నారు. కానీ కొందరు కావాలనే పనిగట్టుకుని నెగిటివ్ గా ప్రచారం చేస్తున్నట్లు కృష్ణ ఆ ఇంటర్వ్యూలో తెలిపారు. కానీ, సర్కారు వారి పాట చిత్రం మహేష్ గత చిత్రాలతో పోలిస్తే పెద్దగా వసూళ్లు రాబట్టలేకపోయింది.
