Pawan praises : జనసేన అధినేత, సినీ హీరో పవన్ కళ్యాణ్ గోదావరి జిల్లాల్లో వారాహి యాత్ర నిర్వహిస్తున్నారు. పెద్ద ఎత్తున జనం ఆయనకు బ్రహ్మరథం పడుతున్నారు. ఈ సందర్భంగా పవన్ అధికార వైసీపీ పై నిప్పులు చెరుగుతున్నారు. అయితే ఆయన యువ హీరోలపై చేసిన వ్యాఖ్యలు ఇప్పుడు వైరల్ అయ్యాయి. తనకు హీరోలందరిపై అభిమానముందని పవన్ చెప్పుకొచ్చారు. కనిపిస్తే అందరితో మాట్లాడుతానని అన్నారు. అయితే సినిమాల పరంగా హీరోల మీద ఉన్న ఇష్టాన్ని రాజకీయాల్లో చూపించవద్దని కోరారు.
అయితే వారాహియాత్రలో భాగంగా ముమ్మడివరంలో పవన్ కీలక వ్యాఖ్యలు చేశారు. హీరోలు ప్రభాస్, మహేశ్ బాబు తన కంటే పెద్ద హీరోలని ఎక్కువ పారితోషికం తీసుకుంటారని వ్యాఖ్యానించారు. నా అభిమానులు.. ఎన్టీఆర్ అభిమానులు తరుచూ గొడవ పడుతుంటారని పలువురు అడిగారని, అయితే సినిమా కేవలం వినోదం మాత్రమేనని, ఇక్కడ ఘర్షణలకు తావు ఉండొద్దన్నారు. నాకు జూనియర్ ఎన్టీఆర్ అంటే ప్రత్యేకాభిమానం ఉంది. అదే విధంగా రాంచరణ్, మహేశ్ బాబు, అల్లు అర్జున్, బాలయ్య, చిరంజీవి, ఇలా ప్రతి హీరోపై గౌరవం ఉందని పేర్కొన్నారు.
ఇక చరణ్, జూనియర్ ఎన్టీఆర్ గ్లోబల్ స్థాయికి వెళ్లొచ్చారని, ఇప్పుడు వారు తెలిసినంతగా ప్రపంచస్థాయిలో తాను కూడా తెలియదని పేర్కొన్నారు. ఈ విషయంలో తనకు ఇగో లేదని, సగటు మనిషి బాగుంటే చాలనే తత్వం తనదని తెలిపారు. కులం, మతం అంటూ గొడవలు వద్దని చెప్పారు.
సినిమాల అభిమానం అక్కడి వరకే అని, కానీ రాజకీయంగా ఆలోచన చేసి ఓటు వేద్దామని పిలుపునిచ్చారు. పోరాటం చేసే వాళ్లే ఈ సమాజానికి కావాలని పేర్కొన్నారు.
అయితే ఈ పోరాటంలో తనతో కలిసి రావాలని పిలుపునిచ్చారు. తాను క్రిమినల్ గ్యాంగులతో పోరాడుతున్నానని చెప్పుకొచ్చారు. కాకినాడ ఎమ్మెల్యే ద్వారం పూడి జనం సొమ్మును దోచుకుంటున్నారని మండిపడ్డారు. ఎవరు ఎంత దోచారో.. ఎంత దాచారో చూపిస్తానని.. ఇది జనసేనకు అధికారమిస్తేనే సాధ్యమవుతుందని కోరారు. ఇంకోసారి దెబ్బతిన్నా పారిపోనని, ఇక్కడే ఉంటానని చెప్పారు. కానీ తప్పు చేస్తే నష్టపోయేది మీరేనని వ్యాఖ్యానించారు.
అయితే కొన్ని రోజులుగా పవన్ కాకినాడ ఎమ్మెల్యే ను టార్గెట్ చేశారు. జనసైనికులను కొట్టించడంతో పాటు వేధించడం, తనను బూతులు తిట్టడం కూడా పవన్ కోపానికి కారణంగా తెలుస్తున్నది. ఏదేమైనా పవన్ యాత్ర గోదావరి జిల్లాల్లో ఉత్సాహంగా నడుస్తు్న్నది. వారాహిపై వస్తున్న తమ అభిమాన హీరోకి అభిమానులు బ్రహ్మరథం పడుతున్నారు. మరోవైపు కాపు సామాజిక వర్గమంతా పవన్ ను ఓన్ చేసుకునేందుకు ప్రయత్నిస్తున్నది.
