Rahul Gandhi : ఈరోజు కాంగ్రెస్ అగ్రనేత రాహుల్ గాంధీకి బెంగళూరు కోర్టు బెయిల్ మంజూరు చేసింది. దీంతో ఆయనకు బీజేపీ వేసిన పరువు నష్టం కేసులో ఊరట లభించింది. వార్తా పత్రికల్లో కాంగ్రెస్ పరువునష్టం కలిగించే ప్రకటనలు జారీ చేసిందని ఆరోపిస్తూ బీజేపీ కర్ణాటక యూనిట్ ఈ దావా వేసింది. దీని విచారణలో భాగంగా ఈరోజు రాహుల్ గాంధీ కోర్టులో హాజరయ్యారు.
గత బీజేపీ ప్రభుత్వం అభివృద్ధి పనుల్లో 40 శాతం కమీషన్ వసూలు చేసినట్లు కాంగ్రెస్ పార్టీ ఆరోపించిందని, 40 శాతం కమీషన్ ప్రభుత్వంగా అభివర్ణిస్తూ పత్రికల్లో పెద్ద ఎత్తున ప్రకటనలు ఇచ్చిందని పేర్కొంటూ బీజేనీ నేత కేశవ్ ప్రసాద్ ఆ పార్టీ తరపున గతంలో పరువు నష్టం దావా వేశారు. వివిధ రకాల ఉద్యోగాలకు బీజేపీ రేటు కార్డులు పెట్టిందంటూ కాంగ్రెస్ పార్టీ పోస్టర్లు వేసిందని, తద్వారా తమ పార్టీ పరువుకు భంగం కలిగిందని పిటిషన్ లో పేర్కొన్నారు.
ఈ అంశంపై ఇదివరకు విచారణ జరిపిన బెంగళూరులోని ఎంపీ/ఎమ్మెల్యే కోరల్టు కర్ణాటక సీఎం సిద్ధరామయ్య, ఉప ముఖ్యమంత్రి డీకే శివకుమార్ లకు బెయిల్ మంజూరు చేసింది. అలాగే సహ నిందితుడిగా ఉన్న రాహుల్ జూన్ 7న కోర్టులో హాజరుకావాలని ఆదేశించిన సంగతి తెలిసిందే. ఈ క్రమంలోనే ఆయన న్యాయస్థానం ఎదుట వ్యక్తిగతంగా హాజరయ్యారు.
