తమిళ నటుడు శరత్ కుమార్ అనారోగ్యానికి గురయ్యాడని , ఆసుపత్రిలో చికిత్స పొందుతున్నాడని , అలాగే ఆరోగ్యం విషమించిందని రకరకాల వార్తలు ప్రచారంలోకి వచ్చాయి. అయితే రెండు మూడు రోజులుగా ఈ వార్తలు అదేపనిగా వస్తుండటంతో ఎట్టకేలకు శరత్ కుమార్ పీఆర్ టీమ్ స్పందించింది. శరత్ కుమార్ ఆసుపత్రికి వెళ్లొచ్చిన విషయం నిజమే కానీ మీడియాలో వస్తున్నట్లుగా తీవ్ర అనారోగ్యం కాదని , హెల్త్ చెకప్ అయ్యాక ఇంట్లోనే విశ్రాంతి తీసుకుంటున్నారని స్పష్టం చేసింది.
తెలుగు , తమిళ చిత్రాల్లో నటించాడు శరత్ కుమార్. 90 వ దశకంలో హీరోగా అలాగే విలన్ గా కూడా పలు చిత్రాల్లో నటించాడు. ఇక గతకొంత కాలంగా క్యారెక్టర్ ఆర్టిస్ట్ గా నటిస్తున్నాడు. ఎక్కువగా తమిళ చిత్రాల్లోనే చేస్తున్నాడు. తమిళ స్టార్ హీరో విజయ్ తాజా చిత్రం ” వారిసు ” చిత్రంలో కూడా నటించాడు శరత్ కుమార్. ఈ సినిమా తెలుగులో వారసుడు అనే టైటిల్ తో ప్రేక్షకుల ముందుకు రానుంది.
ఇక శరత్ కుమార్ ఇటీవల స్వల్ప అనారోగ్యానికి గురయ్యారు. దాంతో చెన్నై లోని ఓ ప్రయివేటు ఆసుపత్రికి వెళ్లి అన్ని రకాల పరీక్షలు చేయించుకొని చికిత్స తీసుకున్నాడు. ఆ తర్వాత హాస్పిటల్ నుండి ఇంటికి చేరుకున్నాడు. అయితే హాస్పిటల్ వెళ్ళాడు …… వచ్చాడు దాంతో ఊహాగానాలు చేసేవాళ్ళు శరత్ కుమార్ అనారోగ్యానికి గురయ్యాడు అంటూ రకరకాల వార్తలను వండి వార్చారు. దాంతో ఆ వార్తలను కొట్టిపడేసింది శరత్ కుమార్ పీఆర్ టీమ్.
