Scan.. See the scams :
కర్ణాటకలో ఎన్నికల ముందు సరిగ్గా ఇలాగే జరిగింది. ఇప్పుడు తెలంగాణలోనూ అదే తరహా ప్రచారం జరుగుతోంది. అప్పుడు కర్ణాటకలో బొమ్మై సారథ్యంలో బీజేపీ ప్రభుత్వంపై ఈ ప్రచారం కొనసాగింది. పెయిడ్ సర్కారు అంటూ పెద్ద ఎత్తున ప్రచారం జరిగింది. సీఎం బొమ్మై ప్రతి దాంట్లో 40 శాతం కమిషన్ తీసుకుంటున్నారని ప్రచారం సాగింది. ఇది కూడా బొమ్మై సర్కారు ఓటమిలో కీలకంగా మారింది.
అయితే తాజాగా ఇప్పుడు తెలంగాణలోని పలు గ్రామాల్లో సీఎం కేసీఆర్ సర్కారు పై ఇదే క్యూ ఆర్ కోడ్ పోస్టర్లు వేశారు. ఈ క్యూ ఆర్ కోడ్లు స్కాన్ చేస్తే బీఆర్ఎస్ వైఫల్యాలు, స్కామ్ లతో కూడిన ఫీడీఎఫ్ వస్తున్నది. జోగులాంబ గద్వాల జిల్లా ఉండవల్లి మండలంలోని వివిధ గ్రామాల్లో ఈ పోస్టర్లు ప్రస్తుతం వెలిశాయి.స్కాన్ చేయండి .. బీఆర్ఎస్ గొప్పతనాలు చూడండి అంటూ క్యూ ఆర్ కోడ్ లతో పోస్టర్లు వెలిశాయి.
అయితే ఓ వైపు రాష్ర్ట ఆవిర్భావ దశాబ్ది ఉత్సవాల వేళ ప్రభుత్వ పథకాల మీద పెద్ద ఎత్తున ప్రచారం చేసుకుంటున్నది. అట్టహాసంగా జరుగుతున్న ఈ కార్యక్రమాల ద్వారా ప్రభుత్వం తను పేదలకు చేస్తున్న మంచిని విస్తృతంగా ప్రజల్లోకి తీసుకెళ్తున్నది. అయితే ఇలాంటి సమయంలో ఈ పోస్టర్లు వెలువడడం కలకలం రేపుతున్నది. ఒక్క జోగులాంబ గద్వాల జిల్లాకే పరిమితమయ్యాయా.. లేదంటే రాష్ర్టమంతా వీటిని వేశారా అనేది తేలాల్సి ఉంది. అయితే ఈ క్యూ ఆర్ కోడ్ స్కాన్ చేస్తే ఒక పీడీఎఫ్ డౌన్ లోడ్ అవుతున్నది. పేపర్ లీక్స్, ఢిల్లీ లిక్కర్ స్కామ్, కాళేశ్వరం ప్రాజెక్ట్, రైతు ఆత్మహత్యల పూర్తి వివరాలు ఇందులో ఉన్నాయి. మారాల్సిన సమయం వచ్చిందని మా బతుకులు మనమే బాగు చేసుకుందామని అందులో ఉంది. అయితే మరి ఈ క్యూ ఆర్ కోడ్ కూడా కర్ణాటకలో లాగే ఏదైనా సంచలనం సృష్టిస్తుందా.. లేదంటే పేలని చిచ్చుబుడ్డిలాగే అలాగే ఉంటుందా వేచి చూడాలి.
