Rents in Canada : ఉన్నత చదువులు చదివిన ప్రతి ఒక్కరికి విదేశాల్లో ఉద్యోగం చేయాలనేది ఒక కల. అమెరికా తర్వాత భారత విద్యార్థులు, వృత్తినిపుణులు ఎక్కువగా వలస వెళ్లే దేశం కెనడా. ఇప్పుడు అక్కడ పరిస్థితి దారుణంగా తయారైంది. ఆ దేశంలో ఉండేందుకు ఇళ్లు దొరక్క వెళ్లిన వారు నానా ఇబ్బందులు పడుతున్నారు. ఇళ్ల అద్దెలతో పాటు లీజుల ధరలు ఆకాశాన్నంటుతున్నాయి. చాలా కాలం క్రితమే అక్కడికి వెళ్లిన వారు సొంతంగా ఇళ్లు కొనుక్కుందాం అనుకుంటే ధరలు చూసి జంకుతున్నారు. ఈ పరిణామాలతో విద్యార్థులు, వలసదారులు నగర శివారు ప్రాంతాలకు తరలుతున్నారు. కొందరైతే ఈ అద్దెల భారాన్ని భరించలేక దేశాన్నే వదిలి వెళ్లిపోతున్నారు. ఇళ్ల అద్దెలను భరించలేక కెనడాను వదిలేస్తున్నవారి సంఖ్య 28 శాతంగా ఉన్నట్లు ఆంగస్ రీడ్ ఇనిస్టిట్యూట్ ఓ నివేదికలో పేర్కొంది. ఈ పరిణామాలతో కెనడా ప్రతిష్ఠ దిగజారుతుందని ఆందోళన వ్యక్తం చేసింది. ఎన్నో ఆశలతో కెనడాకు వస్తున్న వలసదారులకు సౌకర్యవంతమైన పరిస్థితులు లేకపోవడంతో తీవ్ర ఇబ్బందులు ఎదుర్కొంటున్నారని అందుకే చాలా మంది ఇతర దేశాల వైపు మళ్లుతున్నట్లు పేర్కొంది.
అమెరికా తర్వాత భారతీయులు ఎక్కువగా వెళ్లేది కెనడానే. ఏటా లక్షలాది మంది యువత ఉన్నత చదువులు, ఉద్యోగాల కోసం కెనడాకు వెళ్తుంటారు. ఈ క్రమంలోనే అక్కడ భారీగా పెరుగుతున్న ఇళ్ల అద్దెలు ప్రవాస భారతీయులకు కష్టంగా మారాయి. పెద్ద ఉద్యోగాలు దొరక్కపోయినా పార్ట్ టైం ఉద్యోగాలు చేసైనా సంపాదించుకుందామని అక్కడికి వెళ్తున్న భారతీయులు అద్దెలను చూసి జంకుతున్నారు. కెనడాలో 2013 నాటికి 32,828 మంది ఉన్న భారతీయుల సంఖ్య 2023నాటికి అంటే సరిగ్గా పదేళ్లలో 1,39,715కి చేరింది. పదేళ్లలో ఏకంగా 326 శాతం పెరిగినట్లు గణాంకాలు చెబుతున్నాయి. ప్రస్తుతం అక్కడ చోటుచేసుకున్న ఇళ్ల అద్దెల సంక్షోభం ఎన్నారైలపై తీవ్ర ప్రభావం చూపుతోందని నిపుణులు ఆందోళన చెందుతున్నారు.
2021 ఎన్నికల సమయంలోనే కెనడాలో ఇళ్ల ధరలు విపరీతంగా పెరిగాయి. వ్యాపారులు, సంపన్న కార్పొరేట్లు, విదేశీ ఇన్వెస్టర్లకు కెనడాలో ఇల్లు లాభసాటిగా మారాయని అప్పట్లో లిబరల్ పార్టీ పేర్కొంది. దీంతో సంపన్నులు, ఫారిన్ ఇన్వెస్టర్లు భారీగా ఇళ్ల కొనుగోళ్లు చేపట్టారని తెలిపింది. ఈ పరిస్థితి కారణంగా ధరలు భారీగా పెరిగాయంటూ వివరణ ఇచ్చింది. ఆ ఎన్నికల్లో విజయం తర్వాత కెనడావాసులు కాని వారు ఇళ్లు కొనడంపై నిషేధం అమలు చేసింది. మరోవైపు.. కెనడాకు వలసదారులు పెరిగిపోయిన కారణంగా ఇళ్ల సంక్షోభం ఏర్పడిందని 44.5 శాతం మంది కెనడియన్లు అభిప్రాయపడుతున్నారు. భారత్ నుంచి కెనడాకు వెళ్లిన వారు శాశ్వత నివాసం ఏర్పాటు చేసుకునేందుకు ఓ సంఘంగా ఏర్పడ్డారని, ఏటా వీరి సంఖ్య పెరుగుతుండడంతో ఇబ్బందులు తప్పడం లేని అక్కడి ప్రజలు భావిస్తున్నారు.
