‘Kartikeya 3’ హీరో నిఖిల్, డైరెక్టర్ చందూ మొండేటి కాంబోలో వచ్చిన సినిమా ‘కార్తికేయ 2’. ఈ సినిమా ఏ మేరకు బ్లాక్ బస్టర్ హిట్ సాధించిందో ప్రత్యేకంగా చెప్పాల్సి అవసరం లేదు. దీనికి నిర్మాతలుగా అఖిషేక్ అగర్వాల్, టీజీ విశ్వప్రసాద్ వ్యవహరించారు. 2022, ఆగస్ట్ 13న పాన్ ఇండియా స్థాయిలో రిలీజైన ఈ సినిమా భారీ వసూళ్లను రాబట్టింది. నిఖిల్ సరసన అనుపమా పరమేశ్వరన్ నటించగా, మిగిలిన పాత్రల్లో అనుపమ్ కేర్, ఆదిత్య మీనన్, సత్య, శ్రీనివాస్ రెడ్డి తదితరులు నటించారు. 2022లో భారీ హిట్లు సాధించిన సినిమాల్లో కార్తికేయ 2 ఫస్ట్ ప్లేస్ లో ఉంటుంది. ఈ సినిమా రిలీజై ఏడాది పూర్తి చేసుకున్న సందర్భంగా టీమ్ సెలబ్రేషన్స్ చేసుకుంది.
కార్తికేయ 2 రిలీజై ఏడాది పూర్తి చేసుకున్న సందర్భంగా హీరో నిఖిల్ తో పాటు టీమ్ మొత్తం సందడిగా గడిపారు. తెలుగు మీడియా రివ్యూలతోనే పాన్ ఇండియా లెవల్ లో మంచి ఆదరణ లభించిందని తెలిపారు. ఈ సినిమాపై తెలుగు ఆడియన్స్, మీడియా చూపిన మమకారం మరువలేనిదన్నారు. ఆ సమయంలో కలుసుకోలేకపోయాం అని బాధపడినా.. ఇప్పుడు కలుసుకున్నందుకు ఆనందంగా ఉందని యూనిట్ చెప్పింది.
దర్శకుడు చందూ మాట్లాడుతూ.. ‘కార్తికేయ-2 విజయం ఆనందాన్ని ఇచ్చింది. దీంతో పాటు ఓల్ టీమ్ లో మరింత విశ్వాసం నింపింది. దీన్నే స్ఫూర్తిగా తీసుకొని త్వరలో ‘కార్తికేయ-3’ని కూడా తీసుకుస్తున్నట్లు తెలిపారు. ప్రస్తుతం నిఖిల్ చేతిలో మూడు ప్రాజెక్టులు ఉన్నాయి. నాకు కూడా రెండు సినిమాలు ఉన్నాయి. ఇవి పూర్తయిన తర్వాత కార్తికేయ 3 ని సెట్స్ పైకి తీసుకెళ్తాం’ అన్నాడు.
నిర్మాత ఎస్కేఎన్ మాట్లాడుతూ.. ‘నిఖిల్, చందూ కాంబోకు గుర్తింపు వచ్చంది. తెలుగు రాష్ట్రాల్లో కార్తికేయ 2 ఘన విజయం సాధించింది. పాన్ ఇండియా స్థాయిలో కూడా ఆకట్టుకుంది. వీరి కార్తికేయ 3కి కూడా అన్ని పరిస్థితులు కలిసి వస్తే నేనే నిర్మాతగా ఉంటాను. సెలబ్రేషన్లో భాగమైనందుకు ఆనందంగా ఉంది’ అన్నారు.
ఇక కార్తికేయ-2 వసూళ్ల విషయానికి వస్తే కేవలం రూ. 20 కోట్ల బడ్జెట్ తో సినిమా తీయగా, ప్రమోషన్, ఇతర ఖర్చులు కలిపి రూ. 25 కోట్లయ్యింది. ఈ సినిమా మాత్రం ఇండియాతో పాటు ఓవర్ సీస్ లో రూ. 121 కోట్లు రాబట్టింది. అప్పట్లో ఇది ట్రేడ్ వర్గాలను తీవ్ర విశ్మయానికి గురి చేసింది.
