ఆస్కార్ కల నిజం చేసిన దర్శక ధీరుడు

శాంతి నివాసం అనే సీరియల్ తో దర్శకుడిగా మారాడు ఎస్ ఎస్ రాజమౌళి. కథా రచయిత విజయేంద్ర ప్రసాద్ తనయుడైన ఎస్ ఎస్ రాజమౌళి కథా చర్చల్లో పాల్గొనే సమయంలోనే ఆ సీన్ ఇలా చేయాలి , ఆ సీన్ అలా చేయాలి అంటూ వాదించే వాడట. అయితే అప్పట్లో అతడి గురించి పెద్దగా ఎవరికీ తెలియదు కాబట్టి పాపం ! జక్కన్న చెప్పే సలహాలు చాలామంది దర్శకులు తీసుకోలేదట. పైగా అవమానించిన సంఘటనలు కూడా కోకొల్లలుగా ఉన్నాయట.

అయితే తన లోని ఆలోచనలకు రూపం ఇవ్వాలంటే కథా రచయితగా తండ్రితో కలిసి కూర్చుంటే లాభం లేదని , మెగా ఫోన్ చేతబట్టాలని ఫిక్స్ అయ్యాడట. దాంతో గట్టి ప్రయత్నాలే చేసి రాఘవేంద్రరావుని మెప్పించి ఒప్పించి దర్శకత్వ శాఖలో కొన్నాళ్ళు మాత్రమే పనిచేసాడు. అతడిలోని ప్రతిభను గమనించిన రాఘవేంద్రరావు శాంతి నివాసం అనే సీరియల్ కు దర్శకత్వం వహించమని ఆఫర్ ఇచ్చాడు. ఇంకేముంది ఆ సీరియల్ తో మంచి పేరు తెచ్చుకున్నాడు రాజమౌళి. శాంతినివాసం బుల్లితెరపై సంచలన విజయం సాధించింది.

అయితే …… సీరియల్ కు దర్శకత్వం వహించి హిట్ కొట్టినప్పటికీ తనని తాను నిరూపించుకున్నప్పటికీ రాజమౌళి కష్టాలు తీరలేదు. సినిమా అవకాశం ఇచ్చాడు రాఘవేంద్రరావు. హీరోగా జూనియర్ ఎన్టీఆర్ ను ఇచ్చాడు. నూనూగు మీసాల ఎన్టీఆర్ ను చూసి భోరున ఏడ్చాడట రాజమౌళి. ఇంత లావుగా ఉన్నాడు వీడు హీరో ఏంటి ? నా ఖర్మ కాకపోతే అని. అంతేకాదు ఈ కష్టాలు చాలవన్నట్లుగా స్టూడెంట్ నెం 1 చిత్రానికి దర్శకుడు రాజమౌళి అయినప్పటికీ ……. దర్శకత్వ పర్యవేక్షణ కె. రాఘవేంద్రరావు వేసుకున్నారు…… ఆయనే కొని సీన్లు పర్యవేక్షించాడు కూడా.

అయితే స్టూడెంట్ నెం 1 షూటింగ్ రెండు వారాలు గడిచాక ఎన్టీఆర్ ని తిట్టుకున్న రాజమౌళి అతడి ప్రేమలో పడిపోయాడు. అప్పటి నుండి ఎన్టీఆర్ – జక్కన్న జిగిరీ ఫ్రెండ్స్ అయ్యారు. ఆ విషయం పక్కన పెడితే స్టూడెంట్ నెం 1 చిత్రం పూర్తి చేసాడు …… విడుదల అయ్యింది. కట్ చేస్తే …. సూపర్ హిట్ అయ్యింది. ఇంకేముంది అప్పుడు రాజమౌళి పేరు మారుమ్రోగింది.