సార్వత్రిక ఎన్నికల కోసం పార్టీ ముసాయిదా మేనిఫెస్టోను విడుదల చేసేందుకు ప్రతిపక్ష తెలుగుదేశం పార్టీ సమాయత్తమవుతోంది. ఈ ఏడాది దసరా (2024) రోజున విడుదల చేస్తారని ఇప్పటికే పార్టీ కార్యకర్తలు, నాయకుల నుంచి బాహాటంగానే వినిపిస్తోంది. ముసాయిదా మేనిఫెస్టోపై రాష్ట్ర వ్యాప్తంగా చర్చించి చివరకు ప్రజలకే ఏవి మేలు చేస్తాయో వాటినే మేనిఫెస్టోలో పెట్టినట్లు తెలుస్తోంది.
ఈ విషయాన్ని పార్టీ ఏపీ శాఖ అధ్యక్షుడు అచ్చెన్నాయుడు ఆదివారం (మే 21) రోజున గుంటూరులో వెల్లడించారు. బీసీల సదస్సులో పాల్గొన్న ఆయన తెలుగుదేశం పార్టీ తన హయాంలో చేసిన బీసీ సంక్షేమం, వైఎస్ జగన్మోహన్ రెడ్డి ప్రభుత్వం తమకు చేసిన అన్యాయంపై చర్చించారు. సమావేశంలో బీసీ నేతలు, మాజీ మంత్రులు యనమల రామకృష్ణుడు, కొల్లు రవీంద్ర తదితరులు పాల్గొన్నారు.
జగన్ మోహన్ రెడ్డి బీసీల కోసం 56 కార్పొరేషన్లు ఏర్పాటు చేశారని, కానీ వాటికి ఇప్పటి వరకూ ఒక్క రూపాయి కూడా ఇవ్వలేదని అచ్చెన్నాయుడు ఆరోపించారు. రూపాయి కూడా ఇవ్వకుండా కమిషన్లను ఎందుకు ఏర్పాటు చేశారంటూ ప్రభుత్వాన్ని నిలదీశారు. బీసీలకు సముచిత ప్రాతినిధ్యం కల్పించిన తొలి రాజకీయ పార్టీ తెలుగు దేశం పార్టీనే అన్నారు. స్థానిక సంస్థల్లో బీసీలకు సీనియర్ నందమూరి తారక రామారావు 27 శాతం రిజర్వేషన్లు కల్పించగా, ఆయన వారసుడిగా పార్టీ పగ్గాలను చేపట్టిన చంద్రబాబు నాయుడు దానిని 34 శాతానికి పెంచారని అచ్చెన్నాయుడు సభా వేదికగా చెప్పారు. బీసీ జనాభా గణన చేపట్టాల్సిన అవసరాన్ని నొక్కిచెప్పిన ఏపీ టీడీపీ అధినేత కేంద్ర ప్రభుత్వంపై నేతలు ఒత్తిడి తేవాలని కోరారు. దేశంలో ముఖ్యంగా ఆంధ్రప్రదేశ్ లో బీసీ జనాభా గణన, బీసీలకు తగిన గుర్తింపు కోసం ప్రతి బీసీ నాయకుడు గళం విప్పాలని కోరారు.
