బాంబు పేల్చిన బండి.. ఆ ఎమ్మెల్యేలు టచ్ లో ఉన్నట్లు ప్రకటన

ఎన్నికలు సమీపిస్తున్న వేల రాజకీయ నాయకుల అంచనాలు, సమీకరణాలు రోజు రోజుకు మారుతున్నాయి. తెలంగాణలో నిద్ర మత్తులో ఉన్న కాంగ్రెస్ కర్ణాటక గెలుపుతో లేచింది. లేవడమే కాదు పరుగెడుతుందనే చెప్పాలి. ఇక జూపల్లి, పొంగులేటి కూడా కాంగ్రెస్ లో చేరుతారన్న సంకేతాలతో మరింత జోష్ పెరిగింది. కొన్ని రోజులుగా వర్గపోరుతో కుమ్ములాటలో ఉన్న హస్తం పార్టీ మెల్ల మెల్లగా జనాల నోళ్లోల నానుతూ వస్తుంది.

ఇక భారతీయ జనతా పార్టీ గురించి చూసుకుంటే బండి సంజయ్ నాయకత్వంలో పార్టీ బాగా ప్రాచుర్యం పొందింది. తెలంగాణలో ఓటు శాతం కూడా గతం కంటే పెరిగింది. దీనికి తోడు కొందరు సీనియర్ నాయకుల చేరికలు కూడా పార్టీకి బాగా కలిసి వచ్చాయి. ఒకటి రెండు సీట్లకే పరిమితమైన జీహెచ్ఎంసీలో దాదాపు 40కి పైగా సీట్లను తన ఖాతాలో వేసుకుంది. ఆ తర్వాత వచ్చిన దుబ్బాక, హుజూరాబాద్ ను కూడా గెలిచి సీట్ల సంఖ్య పెంచుకోగలిగింది. తెలంగాణలో బీఆర్ఎస్ కు ప్రత్యాన్మాయంగా ఉన్న పార్టీగా గుర్తింపు సంపాదించుకోవడంలో సక్సెస్ అయ్యింది. అయితే ఇటీవల పార్టీలో అధ్యక్ష పదవికి పోటీ పెరుగుతున్నా. ఢిల్లీ పెద్దలు మాత్రం మార్చేది లేదని తేల్చి చెప్తున్నారు. బండి నాయకత్వంలోనే ఎన్నికలకు వెళ్తామని.. ఈటలకు ప్రచార బాధ్యతలను అప్పగించారు.

కుత్బుల్లాపూర్ లోని బీజేపీ పార్టీ కార్యాలయం ప్రారంభోత్సవం సందర్భంగా ఏర్పాటు చేసిన భారీ సమావేశంలో బండి సంజయ్ మాట్లాడారు. ఇప్పటి వరకు బీజేపీతో 25 మంది ఎమ్మెల్యేలు టచ్ లో ఉన్నారని, సమయం కోసం వారు ఎదురు చూస్తున్నారని చెప్పారు. కాంగ్రెస్, బీఆర్ఎస్ మిత్రులన్న ఆయన కాంగ్రెస్ తో పొత్తు పెట్టుకునేది ఏ పార్టీ అయినా సరే బీజేపీ కలవబోదని తేల్చి చెప్పారు. కాంగ్రెస్ నాయకులు దాదాపు 30 మందికి ఇప్పటికీ కేసీఆర్ డబ్బులు పంపిస్తున్నాడని.. ఆ విషయం రేవంత్ కు కూడా తెలుసని ఆయన ఆరోపణలు చేశాడు. కాంగ్రెస్ పతనం గ్రేటర్ ఎన్నికల్లో స్పష్టంగా కనిపించిందన్నారు.

ఏదో కర్ణాటకను చూసుకొని హస్తం ఎగిరిపడినా తెలంగాణలో పట్టించుకునే టోడు లేడన్నాడు. ఒక్క ఎమ్మెల్యే గెలిచినా పార్టీ మారకుండా ప్రజల కోసం కొట్లాడిన పార్టీ బీజేపీ అని చెప్పారు. కాంగ్రెస్ నుంచి దాదాపు 19 మంది బీఆర్ఎస్ లో కలిసినప్పుడే కాంగ్రెస్ కహానీ ముగిసిందని ఎద్దేవా చేశారు. బీఆర్ఎస్ మెడలు వంచేది బీజేపీనే అని రాష్ట్రం మొత్తానికి తెలుసు అన్నారు. అమిత్ షా, మోడీ నాయకత్వాన్ని దేశం మొత్తం అక్కున చేర్చుకుందని, తెలంగాణ కూడా డబుల్ ఇంజిన్ సర్కార్ కోసం ఎదురు చూస్తున్నదన్నారు.