Jump with lover : పెళ్లిళ్లు స్వర్గంలో నిర్ణయించబడతాయి అన్న నానుడి బహూషా నిజమే కావచ్చు. ఎందుకంటే లక్షలాది రూపాయలు ఖర్చు చేసి పెళ్లిళ్లు చేసేవారు ఉన్నా.. నిశ్చితార్థాలు, శుభలేఖల పంపకాలు, పెళ్లి వేడుకలు మొదలు, మండపం వరకు అన్ని అరెంజ్ మెంట్స్ చేసినా పెళ్లి మాత్రం జరగడం లేదు. చాలా చోట్ల ఏదో ఒక అవాంతరం ఎదురవుతూనే ఉంది. అమ్మాయి ఇది వరకే మరొకరిని ప్రేమించడం.. కరెక్ట్ పెళ్లి పందిట్లోకి వచ్చే సమయానికి జంప్ కావడం.. అబ్బాయి అదనపు కట్నం అడగడం.. ఇరువైపులా బంధువులకు బేదాభిప్రాయాలు.. ఇలా దేశంలో ఈ మధ్య ఎన్నో రకాల ఘటనలు చోటు చేసుకుంటున్నాయి. ఇక్కడ కూడా ఇలాంటి వాటిల్లో ఒక ఘటన జరిగింది. తెల్లవారి పెళ్లి ఉండగా వధువు ప్రియుడితో వెళ్లిపోయింది. అవమానం భరించలేక ఆమె సోదరులు చేసిన పని సోషల్ మీడియాలో వైరల్ గా మారింది. వివరాల్లోకి వెళితే..
బిహార్ లోని పుర్నియాలో పెళ్లికి ముందు రోజు పెళ్లి కూతురు ప్రియుడితో లేచిపోయింది. వధువు కుటుంబ సభ్యులు పెళ్లి ఏర్పాట్లలో నిమగ్నమయ్యారు. హల్దీ లాంటి ఆచారాలు కూడా పూర్తయ్యాయి. తెల్లరితే పెళ్లి అనగా వధువు ప్రియుడితో వెళ్లిపోయింది. గుడిలో ప్రియుడిని పెళ్లి చేసుకొని వీడియో, ఫొటోలు వాట్సప్ లో కుటుంబ సభ్యులకు షేర్ చేసింది. దీంతో ఆగ్రహంలో ఉన్న కుటుంబంలోని యువతి సోదరుడు తన సోదరికి పిండ ప్రధానం చేశారు. సోదరి దిష్టిబొమ్మ తయారు చేసి మరీ పాడెపై అలంకరించి ఆమె ఫొటోలను దానిపై ఉంచాడు. ఊరేగింపుగా శ్మశాన వాటికకు వెళ్లి అంత్యక్రియలు కూడా పూర్తి చేశాడు.
స్వీటి అనే యువతి ఇంటర్ చదువుతోంది. ఆమెకు పెళ్లి చేయాలని పెద్దలు నిర్ణయించారు. ఇరు వైపులా బంధువులతో పాటు కాబోయే వధువు, వరుడు కూడా ఓకే అన్న తర్వాత పెళ్లి పనులు మొదలుపెట్టారు. ఇక మరుసటి రోజు ఊరేగింపు అనే సమయంలో స్వీటీ లేచిపోయింది. అయితే కొంత కాలంగా అదే గ్రామానికి చెందిన అరుణ్ కుమార్ అనే యువకుడిని స్వీటీ ప్రేమించింది. దీంతో ఆమెకు పెళ్లి చేయాలని కుటుంబ సభ్యులు నిర్ణయించారు. అయితే పెళ్లి వరకు తతంగాన్ని తీసుకువచ్చి ప్రియుడితో జంప్ కావాలని స్వీటీ పథకం పన్నింది. ఇందులో భాగంగానే పెళ్లి రోజు వరకు కుటుంబ సభ్యులకు తనకు పెళ్లి ఇష్టమేనన్నట్లు నటించింది. మహూర్తం ముందు రోజు జంప్ అయ్యింది.
అయితే వధువు కుటుంబం వరుడిపై కిడ్నాప్ కేసు పెట్టారు. పోలీస్ స్టేషన్ కు వరుడితో వచ్చిన స్వీటీ తన ఇష్టపూర్తిగానే వెళ్లానని చెప్పింది. పెళ్లి కూడా తన ఇష్టపూర్తిగా చేసుకున్నట్లు పేర్కొంది. వధువు సోదరుడు సోదరికి పాడెపై ఊరేగించడం, దహన సంస్కారాలు నిర్వహించడం, పిండ ప్రదానం ఇలాంటి ఘటనలు చిత్రీకరించిన వీడియో ప్రస్తుతం సోషల్ మీడియాలో వైరల్ గా మారింది.
