Air Europe Flight : స్పెయిన్ లోని మాడ్రిడ్ నుంచి ఉరుగ్వే వెళుతున్న ఎయిర్ యూరప్ ఫ్లయిట్ గాల్లో భారీ కుదుపులకు గురైంది. బ్యాలన్స్ తప్పి అటూ ఇటూ ఊగిపోయింది. దీంతో విమానంలోని ప్రయాణికులు ఎగిరిపడ్డారు. కొందరు ప్రయాణికులు తమ సీట్ల నుంచి ఎగిరి లగేజీ బాక్సుల్లో పడ్డారు. ఈ ఘటనలో 30 మంది ప్రయాణికులు గాయపడ్డారు. లగేజీ బాక్సుల్లో పడిన ప్రయాణికులు కిందకు దిగుతున్న వీడియో ఇప్పుడు సోషల్ మీడియాలో వైరల్ అవుతోంది.
విమానం భారీ కుదుపులకు లోనవడంతో ఉరుగ్వే వెళ్లాల్సిన ఫ్లయిట్ ను పైలెట్లు దారి మళ్లించి బ్రెజిల్ లో అత్యవసరంగా ల్యాండ్ చేశారు. విమానం ఒక్కసారిగా క్షణాల్లోనే వేగంగా కిందకు దిగిందని, ఆ వెంటనే మళ్లీ అత్యంత వేగంగా పైకి లేచిందని, అటూ ఇటూ ఊగిపోయిందని ప్రయాణికులు చెబుతున్నారు. ప్రమాదానికి కారణాలు ఏంటీ అనేది ఎయిర్ యూరప్ సంస్థ స్పష్టం చేయలేదు. సాంకేతిక కారణాల వల్లే ఇలా జరిగిందని చెబుతున్నారు. బ్రెజిల్ లో విమానం సురక్షితంగా ల్యాండ్ అయిందని, గాయపడిన 30 మంది ప్రయాణికులకు చికిత్స అందిస్తున్నట్లు ఎయిర్ పోర్టు అథారిటీ వెల్లడించింది.
