Anant Ambani Wedding : భారత సంపన్నుడు, రిలయన్స్ అధిపతి ముఖేశ్ అంబానీ ఏం చేసినా మాములుగా ఉండదని మనకు తెలిసిందే. ఆయన మెయింటెనెన్స్ ఓ రేంజ్ లో ఉంటుంది. ఆయన తనయుడు అనంత్ అంబానీ ముందస్తు పెళ్లి వేడుకలకు సర్వం సిద్ధమవుతోంది. జులైలో పెళ్లి జరుగనుండగా, గుజరాత్ లోని జామ్ నగర్ లో మార్చి 1 నుంచి మూడు రోజుల పాటు ముందస్తు పెళ్లి వేడుకలను నిర్వహించనున్నారు. ముకేశ్ అంబానీ, నీతా అంబానీలకు ముగ్గురు సంతానంలో చిన్నవాడు అనంత్ అంబానీ. ఎన్ కోర్ హెల్త్ కోర్ సీఈవో వీరేన్ మర్చంట్, వ్యాపారవేత్త శైలా మర్చంట్ దంపతులు చిన్న కుమార్తె రాధికా మర్చంట్ ను అనంత్ పెళ్లి చేసుకోనున్నారు. అయితే జామ్ నగర్ లో 5 స్టార్ హోటళ్లు లేకపోవడంతో అల్ట్రా-లగ్జరీ టెంట్లలో టైల్డ్ బాత్ రూమ్ లు సహా సర్వసదుపాయాలు ఉంటాయి. ముందస్తు వివాహ వేడుకలకు ఆహ్వానాలు అందిన వారిలో బాలీవుడ్ ప్రముఖులు అమితాబ్ బచ్చన్, షారుఖ్ ఖాన్, క్రికెట్ దిగ్గజాలు సచిన్ టెండూల్కర్, ఎంఎస్ ధోనీ ఉన్నారు.
అతిథుల్లో మెటా సీఈవో మార్క్ జుకర్ బర్గ్, మైక్రోసాఫ్ట్ వ్యవస్థాపకుడు బిల్ గేట్స్, అల్ఫాబెట్ సీఈవో సుందర్ పిచాయ్, అడోబ్ సీఈవో శంతను నారాయణ్, వాల్డ్ డిస్నీ సీఈవో బాబ్ ఐగర్, బ్లాక్ రాక్ సీఈవో లారీ పింక్, అడ్నాక్ సీఈవో సుల్తాన్ అహ్మద్ వంటి అంతర్జాతీయ ప్రముఖులు ఉన్నారు.
దేశీయ వ్యాపార దిగ్గజాలు గౌతమ్ అదానీ, టాటా సన్స్ చైర్మన్ ఎన్.చంద్రశేఖరన్, బిర్లా గ్రూప్ చైర్ పర్సన్ కుమార్ మంగళం బిర్లా, గోద్రేజ్ కుటుంబం, ఇన్ఫోసిస్ చైర్మన్ నందన్ నిలేకని, ఆర్పీఎస్జీ గ్రూప్ హెడ్ సంజీవ్ గోయెంకా, విప్రో రిషద్ ప్రేమ్ జీ, ఉదయ్ కోటక్, అదర్ పూనావాలా, సునీల్ మిత్తల్, పవన్ ముంజాల్ ,రోష్ని నాడార్, నిఖిల్ కామత్, రొన్నీ స్క్రూవాలా, దిలీప్ సంఘ్వీలకు ఆహ్వానాలు అందాయి.
రోహిత్ శర్మ, హార్దిక్, కృనాల్ పాండ్యా, ఇషాన్ కిషన్, కేఎల్ రాహుల్ సహ పలువురు క్రికెటర్లు, బాలీవుడ్ నటులు ఈ వేడుకల ఆహ్వానితుల్లో ఉన్నారు.
మూడు రోజుల పాటు జరిగే ఈ వేడుకలకు ఢిల్లీ, ముంబైల నుంచి ప్రత్యేక విమానాలను ఏర్పాటు చేశారు. హాలీవుడ్ పాప్ గాయని రిహన్నాతో పాటు దిల్జీత్ దోసాన్జ్, ఇతర గాయకులు ప్రదర్శనలు ఇవ్వనున్నారు.
