MLA Amarnath Reddy : పలమనేరు నియోజకవర్గంలో టీడీపీ నాయకుడి మరణంపై స్థానిక టీడీపీ ఎమ్మెల్యే ఎన్. అమర్నాథ్ రెడ్డి తీవ్ర ఆవేదన వ్యక్తం చేశారు. ఈ ఘటనకు పోలీసుల నిర్లక్ష్యమే కారణమని ఆయన నేరుగా ఆరోపించారు. గత వైసీపీ ప్రభుత్వ హయాంలో పనిచేసిన ఎస్ఐనే ఇప్పటికీ కొనసాగుతున్నారని, వైసీపీకి అనుకూలంగా పనిచేసిన పోలీసు అధికారులను బదిలీ చేయమని జిల్లా ఎస్పీని కోరినా ఎలాంటి చర్యలు తీసుకోలేదని ఆయన మీడియా ఎదుట వాపోయారు.
బదిలీలు జరగకపోవడం వల్ల వైసీపీ నేతలతో సంబంధాలున్న పోలీసులు టీడీపీ నాయకులు, కార్యకర్తల మాట వినడం లేదని, వారిని హింసిస్తున్నారని అమర్నాథ్ రెడ్డి ఆరోపించారు. గత ఐదేళ్లుగా వైసీపీకి అనుకూలంగా పనిచేసిన ఈ పోలీసు అధికారులను మార్చమని తాను ఎన్నోసార్లు వేడుకున్నా ఫలితం లేకపోయిందని ఆయన ఆవేదన వ్యక్తం చేశారు.
తాజాగా పోలీసుల వల్లే ఒక టీడీపీ నాయకుడి ప్రాణాలు పోయాయని అమర్నాథ్ రెడ్డి ఆవేదన చెందారు. అధికారంలో ఉండి కూడా తమ పార్టీ నేతలను కాపాడుకోలేకపోతున్నామని ఆయన నిస్సహాయతను వ్యక్తం చేశారు. ఈ మేరకు ఆయన మీడియాతో మాట్లాడిన వీడియో ప్రస్తుతం సోషల్ మీడియాలో వైరల్గా మారింది.
ఈ ఘటనపై టీడీపీ శ్రేణులు తీవ్ర ఆగ్రహం వ్యక్తం చేస్తున్నాయి. అధికారంలో ఉన్నప్పటికీ సొంత పార్టీ నేతలకు రక్షణ కల్పించలేకపోవడంపై వారు ఆందోళన వ్యక్తం చేస్తున్నారు. రానున్న రోజుల్లో ఈ అంశం మరింత రాజకీయ దుమారం రేపే అవకాశం ఉంది.
