Fast Track Immigration : ఢిల్లీలోని ఇందిరా గాంధీ ఇంటర్నేషనల్ (ఐజీఐ) ఎయిర్ పోర్టులో ‘ఫాస్ట్ ట్రాక్ ఇమ్మిగ్రేషన్ ట్రస్టెడ్ ట్రావెలర్ ప్రోగ్రామ్’ (ఎఫ్‌టీఐ-టీటీపీ)ని హోం మంత్రి అమిత్ షా శుక్రవారం ప్రారంభించారు. భారతీయ పౌరులు, ఓవర్సీస్ సిటిజన్ ఆఫ్ ఇండియా (OCI) కార్డ్ హోల్డర్లకు ప్రయాణ అనుభవాన్ని వేగంగా, సులభంగా, మరింత సురక్షితంగా చేయడం దీని లక్ష్యం. ఈ కార్యక్రమం భారతదేశం ఇమ్మిగ్రేషన్ వ్యవస్థను ఆధునీకరించడానికి, భారతీయ పౌరులు, ఓవర్సీస్ సిటిజన్ ఆఫ్ ఇండియా (OCI) కార్డ్ హోల్డర్లకు ప్రయాణ సామర్థ్యాన్ని మెరుగుపరచడానికి తొలి అడుగు.
ఇది ముందుగా ధృవీకరించబడిన భారతీయ పౌరులు, ఓవర్సీస్ సిటిజన్ ఆఫ్ ఇండియా (OCI) కార్డ్ హోల్డర్‌ల కోసం ఇమ్మిగ్రేషన్ ప్రక్రియను క్రమబద్ధీకరించడం, వారి ప్రయాణాన్ని సౌకర్యవంతంగా, సురక్షితంగా చేయడం లక్ష్యంగా పెట్టుకుంది. దీనిపై కేంద్ర మంత్రి రామ్మోహన్ నాయుడు ఫాస్ట్ ట్రాక్ ఇమ్మిగ్రేషన్ ట్రస్టెడ్ ట్రావెలర్స్ ప్రోగ్రాం (FTI-TTP)ని ప్రారంభించేందుకు చాలా సంతోషంగా ఉన్నట్లు తెలియజేశారు. ఈ మేరకు సోషల్ మీడియాలో ట్వీట్ చేశారు.
ఫీజు ఎంత ఉంటుంది?
ఈ ప్రోగ్రామ్ నిర్దేశిత ప్రమాణాలకు అనుగుణంగా ఉన్న భారతీయ పౌరులు, ఓవర్సీస్ సిటిజన్ ఆఫ్ ఇండియా (OCI) కార్డ్ హోల్డర్లకు అందుబాటులో ఉంటుంది. దరఖాస్తుదారులు ఆన్‌లైన్‌లో దరఖాస్తు చేసుకోవాలి. దీని కోసం వారు బయోమెట్రిక్స్ (వేలిముద్రలు, ముఖ చిత్రం) ఇవ్వా్ల్సి ఉంటుంది. దీని కోసం, పెద్దలు రూ. 2,000, మైనర్లకు రూ. 1,000 లేదా ఓవర్సీస్ సిటిజన్ ఆఫ్ ఇండియా (OCI) కార్డ్ హోల్డర్లు 100డాలర్ల నాన్-రిఫండబుల్ ఫీజు చెల్లించాలి.
బయోమెట్రిక్ నమోదు
బయోమెట్రిక్ డేటాను భారతదేశంలోని నిర్దిష్ట అంతర్జాతీయ విమానాశ్రయాలలో లేదా షెడ్యూల్ చేసిన అపాయింట్‌మెంట్ తర్వాత సమీప ఎఫ్ఆర్ఆర్ఓ కార్యాలయంలో సమర్పించవచ్చు. దీని సభ్యత్వం గరిష్టంగా ఐదు సంవత్సరాలు లేదా పాస్‌పోర్ట్ చెల్లుబాటు గడువు ముగిసే వరకు చెల్లుబాటు అవుతుంది.
పాస్ పోర్ట్ అవసరం
ఎఫ్‌టీఐ-టీటీపీ కోసం దరఖాస్తుదారులు తప్పనిసరిగా కనీసం ఆరు నెలల చెల్లుబాటుతో పాస్‌పోర్ట్ కలిగి ఉండాలి. దరఖాస్తుదారు ప్రస్తుత నివాస చిరునామాను అందించడం తప్పనిసరి. అతను/ఆమె ఏదైనా తప్పు సమాచారం లేదా బయోమెట్రిక్‌లను సంగ్రహించడంలో విఫలమైతే దరఖాస్తుదారు అనర్హులు అవుతారు. దరఖాస్తుదారులు పాస్‌పోర్ట్ సైజు ఫోటోగ్రాఫ్ స్కాన్ చేసిన కాపీలు, పాస్‌పోర్ట్ మొదటి, చివరి పేజీలు, అడ్రస్ ప్రూఫ్ తో సహా సంబంధిత పత్రాలను అప్‌లోడ్ చేయాలి.
