బాలీవుడ్ లో విజయపతాకాన్ని ఎగురవేసిన సినిమాలు చాలానే ఉన్నాయి. ఒక్క సినిమా ఒక హీరో కెరీర్ ను మార్చేసింది. బాలీవుడ్ సూపర్ డూపర్ హిట్లలలో ఒకటి 1983 లో వచ్చిన హీరో సినిమా ఒకటి. ఈ సినిమాకు సుభాష్ ఘాయ్ దర్శకత్వం వహించారు. జాకీ ష్రాఫ్ ఈ సినిమాతో ఓవర్ నైట్ స్టార్ అయ్యాడు. ఈ సినిమా తర్వాత మరెన్నో సూపర్‌హిట్ చిత్రాల్లో హీరోగా నటించాడు. కానీ ఈ చిత్రానికి మేకర్స్ మొదటి ఎంపిక జాకీ ష్రాఫ్ కాదు. సుభాష్ మొదట ఈ సినిమాలో తన ఫేవరెట్ స్టార్ ని తీసుకోవాలని అనుకున్నాడు. కానీ అతని ప్రవర్తనతో తీరుతో హీరో సినిమా కాస్టింగ్ మార్చాల్సి వచ్చింది.
సుభాష్ ఘాయ్ బాలీవుడ్ కు ఎన్నో సూపర్ హిట్లను అందించాడు. అందులో ‘హీరో’, ‘జంగ్ కర్మ’, ‘రామ్ లఖన్’, ‘సౌదాగర్’, ‘ఖల్నాయక్’, ‘పర్దేస్’ ‘తాల్’ వంటి చిత్రాలు ఉన్నాయి. దర్శకుడిగా ఎంత కచ్చితంగా ఉంటాడో, కాస్టింగ్ డైరెక్టర్‌గా కూడా అంతే కచ్చితంగా ఉంటాడు. ఇండస్ట్రీకి ఎందరో నటుల్ని పరిచయం చేసి నిలబెట్టాడు. అయితే జాకీష్రాఫ్ లీడ్ రోల్ పోషించిన హీరో సినిమా కు జాకీ ఫస్ట్ ఆప్షన్ కాదు. ఈ రోల్ కోసం మరో హీరోని అనుకున్నాడట.
అప్పటికే సంజయ్ దత్ హీరోగా విధాత చిత్రం షూటింగ్ లో ఉంది. తన తదుపరి చిత్రం హీరో కోసం సంజయ్ నే తీసుకోవాలనుకున్నాడు. అప్పటికే సంజయ్ దత్ డ్రగ్ అడిక్షన్ కారణంగా విధాత షూటింగ్ సమయంలో షూటింగ్ కు ఆలస్యంగా వచ్చేవాడు. ప్రముఖ నటులు షమ్మీ కపూర్, దిలీప్ కుమార్ సంజయ్ కోసం సెట్స్‌లో చాలా సేపు వేచి ఉండాల్సి వచ్చేది. కొన్నిసార్లు షూటింగ్ రద్దు చేసిన సందర్భాలూ ఉన్నాయి. ఎలాగోలా సుభాష్ ఘాయ్ సంజయ్ దత్ తో ‘విధాత’ సినిమా పూర్తి చేశాడు. సంజయ్ దత్ ప్రవర్తనతో విసిగి పోయిన సుభాష్ ఘాయ్ ‘హీరో’లో జాకీ ష్రాఫ్ ని పెట్టేశాడు.
ఓవర్ నైట్ స్టార్ ’హీరో‘
1983లో వచ్చిన ‘హీరో’ సినిమా ఆ ఏడాది సూపర్ హిట్‌గా నిలిచింది. హీరో చిత్రంలో జాకీ సరసన మీనాక్షి శేషాద్రి హీరోయిన్ గా కనిపించింది. ఈ చిత్రం 1983లో బాక్సాఫీస్ కలెక్షన్ లిస్ట్‌లో మూడో స్థానంలో నిలిచింది. ఈ చిత్రం తో జాకీ ష్రాఫ్ కెరీర్ గ్రాఫ్ కూడా పెరుగతూ వచ్చింది. సుభాష్ ఘాయ్‌కి సంజయ్ దత్ నటన బాగా నచ్చిందని, అందుకు అతడిని ‘హీరో’ సినిమాలో తీసుకోవాలనుకున్నాడు. కానీ విధాత షూటింగ్ టైమ్ లో సంజు ప్రవర్తన చూసి మనసు మార్చుకోక తప్పలేదు.
