యాంగ్రీయంగ్ మాన్ డాక్టర్ రాజశేఖర్ హీరోగా నటించిన సంచలన చిత్రం ” శివయ్య ”. ఆర్. సురేష్ వర్మ దర్శకత్వంలో తెరకెక్కిన ఈ చిత్రాన్ని అగ్ర నిర్మాత డాక్టర్ డి. రామానాయుడు నిర్మించడం విశేషం. 1998 మార్చి 27 న విడుదలైన శివయ్య బ్లాక్ బస్టర్ అయ్యింది. అంతకుముందు వరుస ప్లాప్ లతో సతమతం అవుతున్న డాక్టర్ రాజశేఖర్ కు సాలిడ్ హిట్ ను అందించిన చిత్రం శివయ్య.
డాక్టర్ రాజశేఖర్ సరసన మోనికా బేడీ , సంఘవి నటించగా కీలక పాత్రల్లో శ్రీహరి , చలపతిరావు , రవిబాబు , గిరిబాబు , అట్లూరి పుండరీకాక్షయ్య , అశోక్ కుమార్ , కోట శంకర్ రావు , నర్సింగ్ యాదవ్ , శివాజీరాజా , నరసింహరాజు , శివకృష్ణ , కేకే శర్మ , గణేష్ , వేణుమాధవ్ , రమాప్రభ , డాక్టర్ డి. రామానాయుడు తదితరులు నటించారు.
ఎం ఎం శ్రీలేఖ సంగీతం అందించింది. ”మొదటిసారి ముద్దు పెడితే ఎలాగుంటది ” , ” నడిచే దేవుడు వచ్చాడు ” , ” ఓ రంగనాధ ” అనే పాటలు ప్రేక్షకులను అలరించాయి. 1998 మార్చి 27 న విడుదలైన శివయ్య చిత్రానికి ప్రేక్షకులు బ్రహ్మరథం పట్టారు. దాంతో 1998 జులై 12 న హైదరాబాద్ లోని రామానాయుడు సినీ స్టూడియోలో అంగరంగ వైభవంగా శివయ్య శతదినోత్సవ వేడుకలు నిర్వహించారు డాక్టర్ డి. రామానాయుడు. అసలు ఈ సినిమా తీసే సమయంలో డాక్టర్ రాజశేఖర్ తో సినిమా చేయడం ఏంటి ? అని అన్నారట చాలామంది. మిగతావాళ్ళతో పాటుగా హీరో వెంకటేష్ , సురేష్ బాబు కూడా అన్నారట. అయితే రామానాయుడు మాత్రం ఎవ్వరి మాట వినకుండా డాక్టర్ రాజశేఖర్ తో శివయ్య చిత్రాన్ని చేసాడు …… పెద్ద హిట్ కొట్టాడు. దాంతో రామానాయుడు తనయులు వెంకటేష్ , సురేష్ బాబు లు కూడా సంతోషం వ్యక్తం చేశారట….. నువ్వే గెలిచావ్ నాన్నా అంటూ.
