ఓటమి ఎరుగని దర్శక ధీరుడు ఎస్ ఎస్ రాజమౌళి పై సంచలన ఆరోపణలు చేసింది సీనియర్ నటి కాంచన. 1960 – 70 కాలంలో గ్లామర్ తారగా దక్షిణ భారతదేశంలో సంచలనం సృష్టించిన నటి కాంచన. గ్లామర్ కు కేరాఫ్ అడ్రస్ గా నిలిచి తెలుగు , తమిళ , మలయాళ , కన్నడ చిత్రాల్లో నటించింది. ఒకప్పుడు కాంచన గ్లామర్ కోసమే సినిమాలకు వెళ్ళేవాళ్ళు అంటే అతిశయోక్తి కాదు సుమా ! అంతగా ప్రభావం చూపించింది.
అయితే అలాంటి కాంచన తాజాగా దర్శకులు ఎస్ ఎస్ రాజమౌళి పై తీవ్ర ఆరోపణలు చేసింది. బాహుబలి చిత్రంలో ఓ పాత్ర కోసం నన్ను సంప్రదించారు రాజమౌళి. అయితే అందుకు నేను 5 లక్షల పారితోషికం అడిగాను. 5 లక్షల పారితోషికం అంటే చాలా ఎక్కువ అంటూ నన్ను ఆ సినిమాలో తీసుకోలేదని వెల్లడించింది కాంచన.
నాలాంటి సీనియర్ నటికి 5 లక్షల రెమ్యునరేషన్ ఎక్కవనా ? నాకు ఆ డబ్బులు ఇస్తే నాకోసం ఖర్చు పెట్టుకోను కదా ! సేవా కార్యక్రమాలకే వినియోగిస్తున్నాను కదా ! అంటూ రాజమౌళి పై తీవ్ర ఆగ్రహం వ్యక్తం చేసింది. అయితే కాంచన ఆరోపణలపై దర్శకుడు ఎస్ ఎస్ రాజమౌళి ఎలా స్పందిస్తాడో చూడాలి. ఇటీవలే ఆర్ ఆర్ ఆర్ తో ఆస్కార్ సాధించిన రాజమౌళి మహేష్ బాబుతో తన తదుపరి సినిమా చేయడానికి రంగం సిద్ధం చేసుకుంటున్నాడు.