Allu Arjun : జనసేన అధిపతి పవన్ కళ్యాణ్ కు ఐకాన్ స్టార్ అల్లు అర్జున్ మద్దతు కూడా తోడైంది. ఏపీలో ఎన్నికల వేళ పవన్ కు ఇటు ఫ్యామిలీ నుంచి అటు చిత్ర పరిశ్రమ నుంచి మద్ధతు లభిస్తోంది. కొందరు పవన్ కు అనుకూలంగా సోషల్ మీడియాలో పోస్ట్ లు పెడుతుంటే మరికొందరు డైరెక్ట్ గా ప్రజల్లోకి వెళ్లి ప్రచారం చేస్తున్నారు. తాజాగా స్టార్ హీరో అల్లు అర్జున్ పవన్ కు మద్దతు తెలిపారు. ఆయన ‘ఎక్స్’ వేదికగా పోస్ట్ పెట్టారు.
‘‘పవన్ కళ్యాణ్ గారి ఎన్నికల ప్రయాణం విజయవంతంగా సాగాలని కోరుకుంటూ హృదయ పూర్వక శుభాకాంక్షలు తెలియజేస్తున్నా. మీరు ఎంచుకున్న మార్గం, సేవ చేయాలన్న నిబద్ధత పట్ల నేను ఎంత గర్విస్తున్నా. ఒక కుటుంబ సభ్యుడిగా నా ప్రేమ, మద్దతు ఎప్పటికీ మీకే ఉంటాయి. మీ ఆకాంక్షలు, లక్ష్యాలు నెరవేరాలని కోరుకుంటున్నా’’ అని పేర్కొన్నారు.
పవన్ కళ్యాణ్ పిఠాపురం నుంచి ఎమ్మెల్యే అభ్యర్థిగా బరిలో ఉన్నారు. ఇప్పటికే మెగాస్టార్ చిరంజీవి, రాంచరణ్, సాయిధరమ్ తేజ్, వరుణ్ తేజ్ ఇలా కుటుంబ సభ్యులంతా జనసేన పార్టీ విజయం సాధించాలని ఏదో విధంగా మద్దతు తెలిపారు.
