Free Villa : నగరాల్లో ఏ చిన్న ఇల్లు కొనాలన్నా లక్షల్లో మాటే. ఇక విల్లా మాట దేవుడెరుగు.. కోట్లు ఖర్చు చేస్తే కాని దొరకదు. ఇండ్లకు ఉన్న డిమాండ్ అది. నగరాల్లోనే కాదు ఇప్పుడు పల్లెల్లో సైతం ఇండ్లకు ఫుల్ డిమాండ్ ఉంటోంది. ఇల్లు కట్టి చూడు పెళ్లి చేసి చూడు అన్నట్టుగా మారిపోయింది ప్రస్తుత సమాజం. ఇలాంటి పరిస్థితుల్లో ఓ ప్రభుత్వం ఓ విల్లాను ఉచితంగా ఇస్తామని ప్రకటించింది. విల్లా అంటే అర ఎకరమో, ఎకరమో కాదు..ఏకంగా 42 ఎకరాల్లో ఉన్న విల్లాను పూర్తిగా ఉచితంగా ఇస్తామని వెల్లడించింది. అసలు ఈ విల్లా కథెంటో చదవండి మరి..
జర్మనీ నియంత హిట్లర్ గురించి తెలియని వారు ఉండరు. ఆయనకు అత్యంత సన్నిహితుల్లో ఒకరు జోసెఫ్ గోబెల్స్. ఈయన నాజీ పార్టీకి ప్రధాన ప్రచారకుడిగా పని చేశాడు. అప్పట్లో పత్రికలు, రేడియోలు, సినిమాల ద్వారా నాజీ భావజాలాన్ని బలంగా ప్రజల్లోకి తీసుకెళ్లారు. జర్మనీ రాజధాని బెర్లిన్ కు 25 మైళ్ల దూరంలో ఈయనకు ఒక పెద్ద విల్లా ఉంది. దీన్ని 1936లో కట్టారు. సుమారు 42 ఎకరాల్లో చాలా విశాలంగా అద్భుతంగా కట్టారు. గోబెల్స్ ఈ విల్లాను అనేక అవసరాలకు వాడుకున్నాడు. అందులో పలువురు సినిమా హీరోయిన్లతో రొమాన్స్ బాగానే చేశాడని అంటారు.
హిట్లర్ కాలం అంతమైపోయిన తర్వాత గోబెల్స్ కూడా తన కుటుంబంతో కలిసి ఈ విల్లాలోనే ఆత్మహత్య చేసుకున్నాడని చెబుతుంటారు. అప్పటి నుంచి ఈ విల్లా జర్మనీ ప్రభుత్వం ఆధ్వర్యంలోనే ఉంది. అయితే దీని నిర్వహణ ఖర్చు ప్రభుత్వానికి భారంగా ఉండడంతో నాజీ పాలనకు చెందిన విల్లా కావడంతో దీన్ని ఎలాగైనా వదిలించుకోవాలని చూస్తోంది. అయితే ఎవరూ ముందుకు రాపోవడంతో ఇక ఉచితంగా బహుమతి రూపంలో ఇవ్వాలని సంకల్పించింది. గోబెల్స్ తన భార్య, ఆరుగురు పిల్లలతో కలిసి ఆ ఇంట్లోనే ఆత్మహత్య చేసుకోవడంతో భయంతో ఉచితంగా కూడా తీసుకోవడానికి ముందుకు రావడం లేదని తెలుస్తోంది.
