Ardhanareeswaram Dance : నాట్యం అపురూపం, అనిర్వచనీయం, అద్వితీయం.. ఇలా ఎన్ని పదాలు అల్లినా చాలవేమో. సాక్షాత్తు ఆ నటరాజు ఆశీస్సులు ఉంటేనే నాట్యం అబ్బుతుంది. కేవలం కాళ్లు, చేతులు ఆడిస్తేనే నాట్యం చేసినట్లు కాదు. పదాలకు తగ్గట్లు భంగిమలు, భంగిమలకు తగ్గట్లు హావ భావాలు ఉండాల్సిందే. అలా చేసినప్పుడే నటరాజు ఆశీస్సులు అందుకోవడంతో పాటు ప్రేక్షకుల ఆదరణ కూడా అందుకుంటాడు నృత్యకారుడు.
ఇక శివ పార్వతుల ప్రణయ గీతంపై నాట్యం చేయడం అంటే ఎన్నో జన్మల పుణ్య ఫలం వెంట రావాల్సిందే. అరంగేట్రం చేసిన వారు పరమశివుడిని ప్రసన్నం చేసుకునేందుకు శివ పార్వతుల ప్రణయగీతంపై నృత్యం చేయాల్సిందే.
ఇక్కడొక కళాకారుడు అర్ధ నారీశ్వరుడిగా చేసిన నృత్యం ఆద్యంతం అలరించింది. సాక్షాత్తు పరమశివుడు, అమ్మ పార్వతి మాత నృత్యాన్ని చూస్తున్నామా అనేలా ఆకట్టుకున్నాడు. ఇద్దరి హావ భావాలు ముఖంలో పలికిస్తూ.. నాట్యం చేసిన విధానం వీక్షకులను అలరించింది. దీన్ని చూసిన వారు కళాకారుడికి కృతజ్ఞతలు చెప్తున్నారు.
