KTR Natukodi Curry With Gangavva : బీఆర్ఎస్ రాష్ట్ర కార్యనిర్వహణ అధ్యక్షుడు, పురపాలక శాఖ మంత్రి కల్వకుంట్ల తారక రామారావు నాటుకోడి కూర వండారు. ఎప్పుడు బిజీగా ఉండే కేటీఆర్ నాటుకోడి కూర వండటమేమిటని మీకు సందేహం రావచ్చు. కానీ ఇది ముమ్మాటికి నిజమే. స్వయంగా ఆయన చేతుల మీదుగానే కూర వండారు. దీంతో దీనికి సంబంధించిన వీడియో ఒకటి సోషల్ మీడియాలో వైరల్ అవుతోంది.
మైవిలేజ్ షో సభ్యులు గంగవ్వ, అంజి, అనిల్, చందుతో కలిసి ఇటీవల హైదరాబాద్ శివారులో నాటుకోడి కూర వండేందుకు సిద్ధం కావడంతో అటుగా వెళ్తున్న మంత్రి కేటీఆర్ వారతో కలిసి కూర వండి భోజనం చేశారు. ఈ సందర్భంగా సభ్యులతో పలు అంశాలపై చర్చించారు. గంగవ్వతో పోటీపడటం ఎవరి వల్ల కాదని కేటీఆర్ పేర్కొన్నారు. ఆమెతో పోటీపడేది ఒక్క మంత్రి మల్లారెడ్డి మాత్రమేనని చమత్కారంగా అన్నారు.
లంబాడిపల్లెకు పలు తాయిలాలు ప్రకటించారు. లంబాడిపల్లెను రెవెన్యూ గ్రామంగా చేస్తానని హామీ ఇచ్చారు. గంగవ్వ జీవిత కథ తెలుసుకుని ప్రశంసించారు. కొండగట్టు ఆలయ డెవలప్ మెంట్ కోసం ప్రణాళిక రూపొందిస్తున్నట్లు తెలిపారు. రైతులకు సన్నబియ్యం పంపిణీ చేస్తామని చెప్పారు. తెలంగాణ ప్రభుత్వం పలు పథకాలు ప్రవేశపెట్టిందని గుర్తు చేశారు.
తెలంగాణలో రాజకీయ వేడి రగులుకుంది. మూడు పార్టీలు నువ్వా నేనా అన్న ధోరణిలో ప్రచారంలో దూసుకెళ్తున్నాయి. దీంతో ఎప్పటికప్పుడు ప్రజల్లో తిరిగేందుకు ప్రాధాన్యం ఇస్తున్నాయి. బీజేపీ, బీఆర్ఎస్, కాంగ్రెస్ పార్టీలు తమ అభ్యర్థులను ప్రకటించాయి. ఇక సమరమే. సర్వేలన్ని హంగ్ ఏర్పడుతుందని చెబుతున్న నేపథ్యంలో ఏం జరుగుతుందోననే ఉత్కంఠ అందరిలో నెలకొంది.