KCR Family : రెండు దశాబ్దాల తర్వాత తొలిసారిగా తెలంగాణ మాజీ ముఖ్యమంత్రి చంద్రశేఖర్ రావు (కేసీఆర్) కుటుంబం ఎన్నికల బరిలో లేదు. రాష్ట్రంలో మే 13న జరగనున్న ఎన్నికలకు భారత రాష్ట్ర సమితి (బీఆర్ఎస్) వ్యవస్థాపకుడు కుటుంబ సభ్యులు ఎవరూ నామినేషన్ దాఖలు చేయలేదు. 2001లో టీఆర్ఎస్ (ప్రస్తుతం బీఆర్ఎస్) ఏర్పడిన తర్వాత కేసీఆర్ కుటుంబం పోటీకి దూరంగా ఉండడం ఇదే తొలిసారి. మాజీ ముఖ్యమంత్రి లేదా అతని కుటుంబ సభ్యులు 2004 నుంచి ప్రతి పార్లమెంట్, అసెంబ్లీ ఎన్నికల్లో పోటీ చేశారు.
తెలంగాణ ఉద్యమాన్ని ఉధృతం చేసేందుకు తెలుగుదేశం పార్టీ (టీడీపీ)కి రాజీనామా చేసిన కేసీఆర్, కరీంనగర్ నుంచి లోక్‌సభకు, సిద్దిపేట నుంచి అసెంబ్లీకి పోటీ చేశారు. అతను రెండు స్థానాల నుంచి గెలుపొందారు. కానీ పార్లమెంటులో ప్రవేశించడానికి సిద్దిపేటను ఖాళీ చేసి కేంద్రంలోని కాంగ్రెస్ నేతృత్వంలోని యూపీఏ ప్రభుత్వంలో మంత్రి అయ్యారు.
కేసీఆర్ మేనల్లుడు, బీఆర్ఎస్ నేత హరీశ్ రావు సిద్దిపేట నుంచి ఉప ఎన్నికలో గెలుపొందారు. తెలంగాణ అంశంపై కాంగ్రెస్‌తో విభేదాల నేపథ్యంలో 2006, 2008లో ఉప ఎన్నికలను బలవంతంగా ఎదుర్కొన్న టీఆర్ఎస్ వ్యవస్థాపకుడు రెండు పర్యాయాలు కరీంనగర్ స్థానాన్ని నిలబెట్టుకున్నారు.
2009లో కేసీఆర్ మహబూబ్‌నగర్ నుంచి లోక్‌సభకు విజయం సాధించారు. ఈ కాలంలోనే తెలంగాణ రాష్ట్ర లక్ష్యాన్ని సాధించడంలో విజయం సాధించారు. కేసీఆర్ తనయుడు కేటీ రామారావు 2009 ఎన్నికల్లో సిరిసిల్ల అసెంబ్లీ స్థానం నుంచి విజయం సాధించి 2010 ఉప ఎన్నికల్లో ఆ స్థానాన్ని నిలబెట్టుకున్నారు.
2014లో కేసీఆర్ మెదక్ నుంచి లోక్‌సభకు, గజ్వేల్ నుంచి అసెంబ్లీకి పోటీ చేశారు. ఆయన రెండు చోట్ల నుంచి ఎన్నికయ్యారు. 119 మంది సభ్యుల తెలంగాణ అసెంబ్లీలో టీఆర్ఎస్ మెజారిటీ సాధించడంతో, కొత్త రాష్ట్రానికి మొదటి ముఖ్యమంత్రిగా మెదక్ సీటును వదులుకున్నారు.
అదే ఎన్నికల్లో కేసీఆర్ కుమార్తె కవిత నిజామాబాద్ నుంచి లోక్‌సభకు ఎన్నికయ్యారు. సిరిసిల్ల, సిద్దిపేట నుంచి మరోసారి అసెంబ్లీకి ఎన్నికైన ఆయన కుమారుడు, మేనల్లుడు ఆయన కేబినెట్‌లో మంత్రులు అయ్యారు.
2018లో టీఆర్ఎస్ అధికారాన్ని నిలబెట్టుకోగా, 2019 ఎన్నికల్లో నిజామాబాద్ లోక్‌సభ స్థానం నుంచి బీజేపీ అభ్యర్థి ధరంపురి అరవింద్‌ చేతిలో కవిత ఓడిపోయారు. ఆ తర్వాత ఆమె శాసన మండలికి ఎన్నికయ్యారు.
2022లో జాతీయ రాజకీయాలపై దృష్టి సారించేందుకు టీఆర్ఎస్ పేరును బీఆర్ఎస్ గా మార్చారు కేసీఆర్. పదేళ్లపాటు రాష్ట్రాన్ని పాలించిన ఆ పార్టీ గతేడాది చివర్లో కాంగ్రెస్ చేతిలో అధికారాన్ని కోల్పోయింది.
కేసీఆర్ గజ్వేల్, కామారెడ్డి రెండు అసెంబ్లీ స్థానాల నుంచి పోటీ చేశారు. గజ్వేల్‌ను నిలబెట్టుకున్నా కామారెడ్డిలో ఓడిపోయారు. 1985 తర్వాత కేసీఆర్ కు ఇది మొదటి ఓటమి. కేటీఆర్, హరీష్ రావు తమ తమ స్థానాలను కాపాడుకున్నారు.
కవిత మళ్లీ నిజామాబాద్ నుంచి పోటీ చేస్తారనే సంకేతాలు వచ్చినా.. చివరకు ఆమెను పోటీ చేయకూడదని కేసీఆర్ నిర్ణయించుకున్నారు. ఢిల్లీ ఎక్సైజ్ పాలసీ కేసులో ఆమె ఇటీవల అరెస్టయ్యారు.
కేసీఆర్ లోక్‌సభ ఎన్నికల్లో మెదక్ లేదా మల్కాజ్ గిరి నుంచి పోటీ చేస్తారనే ఊహాగానాలు ఉన్నాయి, అయితే ప్రతిపక్ష నాయకుడు రాష్ట్ర రాజకీయాలపై దృష్టి పెట్టాలని నిర్ణయించుకున్నారు.
