Bhagwant Kesari : దసరా కానుకగా వచ్చిన ‘భగవంత్ కేసరి’కి ఆదరణ రోజు రోజుకు పెరుగుతుంది. కేవలం వినోదం కోసమే కాకుండా సమాజానికి చైతన్యం కలిగించే అంశాలతో మేలవించారు దర్శకుడు అనిల్ రావిపూడి. ఇందులో కన్నడ నటి శ్రీలీల కీలక పాత్ర పోషించింది. ఇక ఈ సినిమాలో బ్యాడ్, గుడ్ టచ్ గురించి చిన్నారుల తల్లిదండ్రులకు బాలకృష్ణ అవగాహన కల్పించే సీన్ ప్రస్తుతం సోషల్ మీడియాలో తెగ వైరల్ అవుతోంది. దీనికి అన్ని వైపుల నుంచి ప్రశంసలు దక్కుతున్నాయి.
స్కూల్ యూనిఫామ్ లో ఉన్న ఒక ఐదేళ్ల చిన్నారిని బాలకృష్ణ ‘పాపా.. నీకు వాడు చాక్లెట్ ఇచ్చి మీద చేతులేస్తుంటే తప్పని తెలియదా?’ అడుగుతాడు. ‘ఊహూ..’ అంటూ చిన్నారి అమాయకంగా చెప్తుంది.
అలా చేతులు వేయడం తప్పని ఎవరైనా చిన్నారులకు చెప్తేనే కదా తెలిసేది. అది ఎవరు చెప్పాలి.. ఇంట్లో అమ్మా.. లేదంటే స్కూల్ లో లేడీ టీచర్.. కానీ వారు పట్టించుకోవడం లేదు. బయటి వారు కొందరు చెప్పాలని అనుకున్నా.. ఎలా చెప్పాలన్న సంశయంతో ఆగిపోతారు. దీంతో చాలా మంది చిన్నారులకు గుడ్, బ్యాడ్ టచ్ గురించి అవగాహనే లేకుండా పోతోంది.
ఆ పాపను ఎత్తుకొని వారి స్కూల్ కు వెళ్తాడు భగవంత్ కేసరి. అక్కడి టీచర్లు ఎప్పడూ చెప్పని, కనీసం స్ప్రుషించని అంశం ‘బ్యాడ్ టచ్’ గురించి వివరంగా చెప్పాడు భగవంత్ కేసరి. ఇక సినిమా చూసిన ప్రతీ తల్లి, స్కూల్ టీచర్స్ కు భగవంత్ కేసరి గుడ్, బ్యాడ్ టచ్ గురించి చెప్పారన్నమాట.
ఇంట్లో సోదరులు, తాతల నుంచి బయట ఉన్న మగవాళ్ల వరకు ఎవరైనా వేయకూడని చోట చేయి వేస్తే వెంటనే వెళ్లి అమ్మకు చెప్పాలి. అమ్మనే మిమ్ములను కాపాడుతుంది. అలాగే అమ్మలకు కూడా ఓ మాట చెప్పాడు భగవంత్ కేసరి. ‘అడవిలో క్రూర మృగాలు తిరుగుతాయి. అడవి లోకి అవి సంచరిస్తున్న ప్రదేశాల్లో బోర్డులు పెడతారు. కానీ సమాజాంలో తిరుగుతున్న మానవ మృగాల నుంచి జాగ్రత్తగా ఉండాలని ఎవరు బోర్డులు పెట్టాలి.. ఆ బాధ్యతను తల్లి, స్కూల్ టీచర్ పిల్లలకు నేర్పాలి’. అని భగవంత్ వారికి వివరించారు.
కమర్షియల్ మూవీ పైగా స్టార్ హీరో సినిమాలో ఈ అంశాన్ని వివరించడంతో అనిల్ రావిపూడిపై ప్రశంసల జల్లు కురుస్తోంది. ప్రస్తుతం ఈ సన్నివేశంపై సోషల్ మీడియాలో తెగ చర్చ జరుగుతోంది.
