Vashishta Sketch For Megastar Movie : బోలా శంకర్ తర్వాత కొంత నిరాశలో ఉన్న చిరంజీవి వశిష్ట మంచి హిట్ ఇవ్వబోతున్నట్లు తెలుస్తోంది. చిరంజీవి-వశిష్ట కాంబోలో ఒక సినిమా రానుంది. దీనికి సంబంధించి ఈ రోజు (అక్టోబర్ 28) క్లాప్ కొట్టారు. ప్రస్తుతం ఈ సినిమాకు సంబంధించి ప్రీ ప్రొడక్షన్ పనులు శరవేగంగా జరుగుతున్నాయి. రోజుల వ్యవధిలోనే షూటింగ్ పట్టాలు ఎక్కేలా కనిపిస్తుంది.
అయితే, ఈ మూవీకి సంబంధించి ఒక్కొక్క విషయం మెల్ల మెల్లగా బయటకు వస్తుంది. ఈ సినిమాకు ‘విశ్వంభర’ అనే టైటిల్ ను దాదాపు ఖరారు చేసినట్లు తెలుస్తోంది. చిరంజీవి బ్లాక్ బస్టర్ మూవీ ‘జగదేక వీరుడు-అతిలోక సుందరి’ లాంటి సోషియో ఫాంటసీ కథతో దీన్ని తెరకెక్కిస్తున్నట్లు తెలుస్తోంది. ఈ సినిమాలో అతిలోక సుందరి శ్రీదేవి దేవకన్యగా భువిపైకి వస్తుంది. అయితే విశ్వంభరలో చిరంజీవే దేవలోకం వెళ్తారట.
పదునాలుగు లోకాలు ఉండగా ఈ సినిమాలో దర్శకుడు కథాపరంగా పదిహేనవ లోకం సృష్టిస్తున్నాడట. అక్కడి వాతావరణంను మరింత ఆహ్లాదంగా చూపెట్టబోతున్నారట. అవతార్ లాంటి సినిమానే తెలుగులో తీస్తున్నట్లు అనిపిస్తుంది. అక్కడ జేమ్స్ కేమరూన్ కొత్త గ్రహాన్ని పుట్టిస్తే ఇక్కడ డైరెక్టర్ వశిష్ట ఒక లోకాన్ని క్రియేట్ చేస్తాడన్నమాట. సినిమాకు సంబంధించి సగానికి పైగా బడ్జెట్ వీఎఫ్ఎక్స్ విజువల్స్ కే ఖర్చు చేయబోతున్నారట. ఇందులో రాణాను ప్రతి నాయకుడి పాత్రకు ఎంపిక చేసినట్లు కూడా తెలుస్తోంది. ఇక కథా నాయిక గురించి చెప్పని మేకర్స్.. ఇద్దరి కంటే ఎక్కువ మందే ఉండబోతున్నట్లు చెప్తున్నారు.
