Tamanna Sensational Comments :
మిల్కీబ్యూటీగా గుర్తింపు సంపాదించుకున్న తమన్నా, బాలీవుడ్ నటుడు విజయ్ వర్మ ప్రేమలో ఉన్న సంగతి తెలిసిందే. అయితే వీరు త్వరలో పెళ్లి చేసుకుంటారన్న వార్తలు గుప్పుమన్నాయి. ఈ నేపథ్యంలో తమన్నా స్పందించారు. ప్రస్తుతం కెరీర్ పరంగా బిజీగా ఉన్నానని తెలిపారు. ఇప్పుడే పెళ్లి చేసుకునే ఆలోచన లేదని స్పష్టం చేశారు. ‘ఐదు నెలల్లో నేను నటించిన సినిమాలు, వెబ్సిరీస్లు 6 విడుదలయ్యాయి. వాటిని సక్సెస్ చేసి ప్రేక్షకులు నాపై ఎంతో ప్రేమాభిమానాలు చూపుతున్నారు. వారికి కృతజ్ఞతలు చెప్పాలనుకుంటున్నా. వాళ్ల కోసం నేను నటనలో మరింత శ్రమిస్తా. నటిగా ప్రస్తుతం వైవిధ్యభరితమైన పాత్రల్లో నటించే అవకాశాలు వస్తున్నాయి.
ఇక పెళ్లి గురించి మాట్లాడితే.. వివాహ వ్యవస్థపై నమ్మకం ఉంది. సమయం వచ్చినప్పుడు చేసుకుంటాను. ప్రస్తుతానికి దృష్టి అంతా కెరీర్ పైనే పెట్టాను. ఇప్పుడు పెళ్లి చేసుకునే ఉద్దేశం లేదు’ అన్నారు. గతంలోనూ తమన్నా పెళ్లిపై ఆసక్తికర వ్యాఖ్యలు చేసింది. ఓ ఇంటర్వ్యూలో మాట్లాడుతూ.. ‘పెళ్లి అనేది ముఖ్యమైన బాధ్యత. నచ్చినప్పుడు, సమయం వచ్చినప్పుడు చేసుకోవడం కాదు.. ఆ బాధ్యతకు సిద్ధంగా ఉన్నప్పుడు వివాహబంధంలోకి అడుగుపెట్టాలి.
పెళ్లంటే ఏదో పార్టీ చేసుకోవడం కాదు.. చాలా కాలం కలిసి ఉండే బంధం. అందుకే ఇలాంటి వాటిల్లో జాగ్రత్త అవసరం. కెరీర్ ప్రారంభమైనప్పుడు పదేళ్లు బిజీగా ఉంటానని భావించా. 30 ఏళ్లకు పెళ్లిచేసుకొని పిల్లల్ని కనాలని ప్రణాళిక వేసుకున్నా. కానీ ఆ తర్వాత నిర్ణయాన్ని మార్చుకున్నా. ఇక ఈ విషయంలో ఇప్పటి తరాన్ని నిజంగా ప్రశంసించాలి. మనుపటి తరంలా ఒకరిని చూసి వారి అభిప్రాయాలు మార్చుకోవడం లేదు. నేను కూడా మొదట్లో పక్కవారి ఆలోచనలకు ప్రభావితమయ్యేదాన్ని ఇప్పుడు అలా లేదు. సొంత నిర్ణయాలు తీసుకుంటున్నాను’ అని చెప్పారు.