మిస్టర్ డొనాల్డ్ ట్రంప్ యూ ఆర్ అండర్ అరెస్ట్ …… అంటూ అమెరికా మాజీ అధ్యక్షుడు ట్రంప్ ను అరెస్ట్ చేసారు. కోర్టులో విచారణ తర్వాత విడుదల అయ్యాడు కూడా. క్రిమినల్ అభియోగాలు , కోర్టు విచారణకు హాజరు కాకపోవడం వంటి ఆరోపణలు ఎదుర్కొంటున్న డొనాల్డ్ ట్రంప్ అరెస్ట్ అయి అమెరికా చరిత్రలోనే సరికొత్త చరిత్ర సృష్టించాడు.
ఇప్పటి వరకు అమెరికా అధ్యక్షుడిగా పనిచేసిన వాళ్ళు ఎవరు కూడా అరెస్ట్ కాలేదు. కానీ ఆ రికార్డ్ డొనాల్డ్ ట్రంప్ వశమైంది. శృంగార తారతో ట్రంప్ అనైతిక ఒప్పందం చేసుకున్నాడు. కాగా ఆ కేసు ఇప్పుడు ట్రంప్ మెడకు చుట్టుకుంది. న్యూయార్క్ మాన్ హటన్ కోర్టులో లొంగిపోయిన ట్రంప్ తాను ఎలాంటి నేరాలకు పాల్పడలేదని తెలిపాడు. సుమారుగా గంటపాటు విచారణ తర్వాత ఫ్లోరిడా లోని ఇంటికి వెళ్ళిపోయాడు.
విచారణ తర్వాత ట్రంప్ అమెరికా అధ్యక్షుడు జో బైడెన్ పై తీవ్ర స్థాయిలో విరుచుకు పడ్డాడు. అమెరికాను చూసి ఇప్పుడు అందరూ నవ్వుకుంటున్నారని , దేశాన్ని సర్వనాశనం చేయాలనుకుంటున్న శక్తులను ఎదుర్కొంటున్నందుకే నన్ను ఇలా వేధిస్తున్నారని ఆగ్రహం వ్యక్తం చేసాడు. ఇక ఈ కేసు మళ్ళీ డిసెంబర్ లో కోర్టు ముందుకు రానున్నట్లు తెలుస్తోంది.
