India Vs Afghanistan : టీ20 ప్రపంచకప్‌ లో భాగంగా సూపర్‌-8లో టీమిండియా తన తొలి మ్యాచ్ లో నేడు ఆఫ్ఘనిస్థాన్‌తో తలపడనుంది. టీ20 వరల్డ్ కప్ లో అంతగా రాణించని విరాట్ కోహ్లి పైనే అందరి చూపు నిలుస్తు్న్నది. లెఫ్టార్మ్ స్పిన్నర్ కుల్దీప్ యాదవ్ కూడా ప్లేయింగ్ ఎలెవన్ లో చోటు దక్కించుకోవాలని తహతహలాడుతున్నాడు. ఈ మ్యాచ్‌లో భారత జట్టు కాంబినేషన్‌పై సర్వత్రా చర్చ జరుగుతోంది. ఎలాంటి మార్పులు చేయకుండానే భారత్ గ్రూప్ దశలోకి అడుగుపెడుతుందా లేక స్పెషలిస్ట్ ఫాస్ట్ బౌలర్ స్థానంలో కుల్దీప్‌కు అవకాశం ఇస్తుందా అనేది చూడాలి.
సిరాజ్ ఔట్!:
టోర్నీ ప్రారంభంలో, కెప్టెన్ రోహిత్ శర్మ ఆల్ రౌండర్లయిన హార్దిక్ పాండ్యా, శివమ్ దూబే, అక్షర్ పటేల్, రవీంద్ర జడేజాలను తుది 11 మందిలో ఉంచాలని పట్టుబట్టాడు. న్యూయార్క్‌లోని బౌలర్‌లకు అనుకూలమైన పిచ్‌పై కూడా ఈ వ్యూహం భారత్‌కు అనుకూలించింది. కుల్‌దీప్‌ను జట్టులోకి తీసుకురావాలంటే మహ్మద్ సిరాజ్ లేదా అర్ష్‌దీప్ సింగ్‌ను పక్కన పెట్టాలి. భారత జట్టు రెండు ప్రాక్టీస్ సెషన్లను పరిశీలిస్తే.. పిచ్ స్పిన్నర్లకు సహకరిస్తుందన్న కుల్దీప్ వాదనకు బలం చేకూరుతోంది.
నిరాశపరుస్తున్న కోహ్లీ
ఈ టోర్నీలో విరాట్ ఇప్పటి దాకా రెండంకెల స్కోరు చేయలేకపోయాడు. ఆఫ్ఘనిస్థాన్‌తో జరిగిన టీ20 ఇంటర్నేషనల్‌లో విరాట్ భారత్ తరఫున అత్యధికంగా 201 పరుగులు చేశాడు. ఇందులో ఒక సెంచరీ కూడా ఉంది. ఇప్పుడు వెస్టిండీస్‌లో జరిగే మ్యాచ్ లలో ఫామ్ లోకి వస్తాడని టీమ్ మేనేజ్ మెంట్, అభిమానుల ఆశిస్తున్నారు. మిడిల్, డెత్ ఓవర్లలో సిక్సర్లు బాది జట్టులోకి వచ్చిన శివమ్ ఇప్పటివరకు ఒక్కసారి మాత్రమే అత్యుత్తమ ఫామ్‌లో కనిపించాడు. అమెరికా పిచ్‌లపై అంతగా రాణించలేపోయాడు. కానీ ఇప్పుడు భారీ షాట్లు ఆడాలనుకుంటున్నాడు. భారత స్టార్ టీ20 బ్యాట్స్‌మెన్ సూర్యకుమార్ యాదవ్ అమెరికాపై తన శైలికి విరుద్ధంగా ఆడిన విషయం తెలిసిందే.
ముగ్గురు లెఫ్ట్ ఆర్మ్ స్పిన్నర్లు:
బౌలింగ్‌లో అద్భుతాలు చేస్తున్న హార్దిక్ పాండ్యా పరుగులేమీ చేయలేకపోయాడు. బౌలింగ్‌లో అర్ష్‌దీప్ ప్రదర్శన మ్యాచ్‌ల వారీగా మెరుగుపడింది. జస్ప్రీత్ బుమ్రాకు సరైన జోడిగా నిలుస్తున్నాడు. స్పిన్నర్లకు అనుకూలమైన పిచ్‌పై భారత్ ఎంతమంది స్పిన్నర్లను రంగంలోకి దించనుందో చూడాలి. పేసర్ స్థానంలో కుల్దీప్ జట్టులోకి వస్తే.. భారత అటాక్‌లో ముగ్గురు ఎడమచేతి వాటం స్పిన్నర్లు ఉంటారని, ఈ ముగ్గురి నుంచి ఆఫ్గాన్ బ్యాట్స్‌మెన్ తప్పించుకోవడం అంత సులువు కాదు. మరోవైపు గ్రూప్ దశలోని చివరి మ్యాచ్‌లో వెస్టిండీస్‌తో ఘోర పరాజయం పాలైన ఆఫ్ఘనిస్థాన్ జట్టు ఇక్కడికి చేరుకుంది. తొలి మూడు మ్యాచ్‌లలో నిర్ణయాత్మకంగా నిరూపించుకున్న బౌలర్లు వెస్టిండీస్ బ్యాట్స్‌మెన్ల ధాటికి విలవిలలాడిపోయారు. గ్రూప్ దశలో టాప్ స్కోరర్ ఆఫ్ఘనిస్థాన్ బ్యాట్స్ మెన్ కాగా, టాప్ బౌలర్ కూడా ఆఫ్ఘన్ ప్లేయరే.
