Signal Break : సికింద్రాబాద్ లో ఘోర రోడ్డు ప్రమాదం జరిగింది. సికింద్రాబాద్ కంటోన్మెంట్ క్లబ్ వద్ద సిగ్నల్ బ్రేక్ చేసిన ఓ కారు అదుపు తప్పి మరో కారును ఢీకొని మూడు పల్టీలు కొట్టింది. సికింద్రాబాద్ క్లబ్ సర్కిల్ సిగ్నల్ వద్దకు ఓ ఎస్ యూవీ కారు వచ్చింది. సిగ్నల్ పడుతుందనే తొందరలో కారును డ్రైవర్ స్పీడుగా పోనిచ్చాడు. ఈ క్రమంలోనే మరోవైపు నుంచి వస్తున్న ఓ కారు ఎస్ యూవీకి అడ్డుగా వచ్చింది. దీంతో రెండు వాహనాలు ఢీకొన్నాయి.
సిగ్నల్ బ్రేక్ చేసిన కారు మూడు పల్టీలు కొట్టింది. దీంతో ఘోర ప్రమాదం చోటు చేసుకుంది. అదృష్టవశాత్తు కారులోని వారు గాయాలతో బయటపడ్డారు. ఘటనపై స్థానికులు పోలీసులకు సమాచారం
ఇచ్చారు. విషయం తెలుసుకున్న పోలీసులు ఘటనా స్థలానికి చేరుకొని విచారణ చేపట్టారు. గాయాలైన వారిని ఆస్పత్రికి తరలించారు. కారు ప్రమాద దృశ్యాలు సీసీ కెమెరాలో రికార్డు కాగా.. వాటి ఆధారంగా పోలీసులు దర్యాప్తు చేస్తున్నారు.