Shahrukh’s ‘Dunki’ :
బాలీవుడ్ బాద్షా షారుఖ్ ఖాన్ బ్యాక్ టు బ్యాక్ బ్లాక్ బస్టర్స్ అందుకున్నాడు. దాదాపు ఐదేళ్ల గ్యాప్ తర్వాత షారుఖ్ ఖాన్ నుంచి ‘పఠాన్’ మూవీ వచ్చింది. ఈ సినిమాకు నార్త్.. సౌత్ అనే తేడా లేకుండా ఆడియన్స్ బ్రహ్మరథం పట్టారు. దీంతో ఈ సినిమా కలెక్షన్లు ఏకంగా వెయ్యి కోట్ల క్లబ్ లో చేరాయి. ఈ సినిమా విడుదలైన ఏడు నెలలకే షారుఖ్ నుంచి ‘జవాన్’ సినిమా వచ్చింది.
తమిళ దర్శకుడు అట్లీ తెరకెక్కించిన ‘జవాన్’ సైతం బ్లాక్ బస్టర్ హిట్ గా నిలిచింది. ఈ సినిమాలో స్టార్ నటీనటులంతా దక్షిణాది వారు కావడంతో ఈ సినిమా కూడా నార్త్.. సౌత్ అనే తేడా లేకుండా కలెక్షన్ల పరంగా దూసుకెళుతోంది. షారుఖ్ ‘పఠాన్’ కలెక్షన్లను ‘జవాన్’ మూవీ బీట్ చేయడం ఖాయమని ట్రేడ్ వర్గాలు అంచనా వేస్తున్నాయి.
షారుఖ్ నుంచి బ్యాక్ టు బ్యాక్ హిట్స్ వచ్చాక తన తదుపరి మూవీని డిఫరెంట్ కాన్సెప్ట్ తో చేసేందుకు రెడీ అవుతున్నాడు. సామాజిక అంశాలను ఇతివృత్తం చేసుకుని మనసుకు హత్తుకునేలా తీసే ప్రముఖ దర్శకుడు రాజకుమార్ హిరాణీతో షారుఖ్ తన తదుపరి మూవీ చేయబోతున్నాడు. ఈ సినిమా టైటిల్ ‘డంకీ’ అని తెలుస్తోంది.
కాగా రాజకుమార్ హిరాణీ గతంలో చేసిన సినిమాలన్నీ కూడా బాక్సాఫీస్ వద్ద సూపర్ హిట్స్ గా నిలిచాయి. మున్నాభాయ్ ఎంబీబీఎస్.. లగే రహో మున్నాభాయ్.. పీకే.. సంజు.. 3 ఇడియట్స్ సినిమాలన్నీ కూడా దేనికదే సూపర్ హిట్స్ గా నిలిచాయి. ఈ నేపథ్యంలో షారుఖ్ తో రాజకుమార్ హిరాణీ తెరకెక్కించే ‘డంకీ’ కూడా సూపర్ హిట్ అవుతుందనే టాక్ వినిపిస్తోంది. దీంతో షారుఖ్ హట్రిక్ కొడతాడా? లేదా అనే ఆసక్తి అందరిలోనూ నెలకొంది.