YCP MLA’s Chanting :
ఏపీ అసెంబ్లీ సమావేశాల్లో విచిత్ర పరిస్థితి నెలకొంది. జనం నవ్విపోదురు గాక నాకేటి సిగ్గు అన్నట్లుగా ప్రవర్తించారు మంత్రులు, ఎమ్మెల్యేలు. ఎలాగూ సభలో ప్రతిపక్ష పార్టీ సభ్యులు లేకుండా బయటకు పంపించారు. ఇంకేం మాకెవరు అడ్డు అన్నట్లుగా ప్రవర్తించడం జనాన్ని విస్మయానికి గురిచేసింది. సభ నడస్తున్నంత సేపు సీఎం జగన్ భజనకే మంత్రులు, ఎమ్మెల్యేలు పరిమితమయ్యారు.
రాష్ట్రంలో తాము చేసిన అభివృద్ధిపై అసలైన చర్చ లేకుండానే అసెంబ్లీ సమావేశాలను కానిచ్చేశారు. ఎంతసేపు మా జగన్ ఇది.. అది అంటూ పొగడ్తల వర్షానికే పరిమితమయ్యారు. ఇంతకీ జనానికి చేసిన మేలు ఏంటో మాత్రం చెప్పనే లేదు. గతంలో ఏ ముఖ్యమంత్రికి సాధ్యం కాని అభివృద్ధి, సంక్షేమాని మా ముఖ్యమంత్రి చేసి చూపించారని గొప్పలు చెప్పుకోవడానికి పూర్తి సమయాన్ని కానిచ్చేశారు. ఇక ప్రతిపక్ష పార్టీల నేతలపై మాత్రం విమర్శలు గుప్పించడమే పనిగా పెట్టుకున్నారు. వారు సభలో లేరనే కనీస మర్యాద లేకుండా విమర్శలు చేశారు. ఎంతసేపు గత ప్రభుత్వంపై మాత్రమే విమర్శలు చేయడానికే సమయం కేటాయించారు. కానీ తమ ప్రభుత్వ హయాంలో రాష్ట్రానికి తామేమీ వెలగబెట్టామో మాత్రం చెప్పుకోలేకపోయారు.
ఇక తమ సభ్యుల పొగడ్తలతో సీఎం జగన్ మాత్రం ఉబ్బితబ్బిబ్బయ్యారు. సభ నడుస్తున్నంతసేపు, ప్రతిపక్ష నేత పై విమర్శలు, తనపై పొగడ్తలు వింటూ నవ్వుతూ ఉన్నారు. సభలో లేని వ్యక్తిపై ఇలా మాట్లాడడం సరికాదని కూడా సీఎం హోదాలో చెప్పలేకపోయారు. ఇక్కడికే తనకు ఆనందం అన్నట్లుగా వెకిలి నవ్వులు నవ్వుతూ వికట్టహాసం చేసినట్లుగా ప్రవర్తించారు. దీనిపై విమర్శలు వ్యక్తమవుతున్నాయి. సీఎం హోదాలో ఉన్న ఒక వ్యక్తి ఇలా ప్రవర్తించడం మొదటిసారిగా చూస్తున్నామని రాజకీయ విశ్లేషకులు అభిప్రాయపడుతున్నారు. ఇక ఈ ఆరు నెలలు ఇలాగే నవ్వుకోని అంటూ టీడీపీ నేతలు విమర్శలు చేస్తున్నారు. జగన్ కు అధికారం ఉండేది ఈ ఆరు నెలలు మాత్రమేనని చెప్పుకొచ్చారు.
