Brahmaji తెలుగు సినిమాల్లో తనకంటూ ప్రత్యేకత సంపాదించుకున్న నటుడు బ్రహ్మాజీ. విలక్షణమైన పాత్రలు పోషించి శభాష్ అనిపించుకున్నాడు. గులాబీతో ప్రస్థానం ప్రారంభించి సిందూరంలో హీరోగా ఎంట్రీ ఇచ్చాడు. తరువాత క్యారెక్టర్ ఆర్టిస్టుగా మారి పలు చిత్రాల్లో తనదైన శైలిలో నటించి మెప్పించాడు. పాత్రలకు జీవం పోశాడు. బ్రహ్మాజీ ఏం చేసినా సంచలనంగానే ఉంటుంది.
తన కొడుకు సంజయ్ రావు హీరోగా స్లమ్ డాగ్ హస్బెండ్ సినిమా తెరకెక్కుతోంది. ఈనెల 29న విడుదలవుతోంది. సినిమా ప్రమోషన్లలో బ్రహ్మాజీ కూడా పాల్గొంటున్నాడు. ఇటీవల నగరంలో కురిసిన వర్షాలకు నీరంతా ఏరులై పారింది. ఈ సందర్భంలో బ్రహ్మాజీ కూడా కష్టాలు ఎదుర్కొన్నాడు. వర్షంలో చిక్కుకుపోయాడు. దీంతో సమస్య తీవ్రత గుర్తించి దగ్గరలో ఉన్న తెలిసిన వారింట్లో కారు పార్కు చేసి తన ఇంటికి చేరుకున్నాడు.
నగరంలో నీళ్లను చూసి ఓ కామెంట్ పోస్టు చేశాడు. తాను ఓ బోటు కొనుక్కోవాలని అనుకుంటున్నానని నగర పరిస్థితిని గురించి ట్వీట్ చేశాడు. దీనిపై రకరకాల కామెంట్లు వచ్చాయి. అందరు బ్రహ్మాజీని తిడుతూ కామెంట్లు చేశారు. హైదరాబాద్ రెయిన్ అనే ట్యాగ్ కూడా జత చేయడంతో దారుణంగా ట్రోల్ చేశారు. ఆంధ్రోడా అంటూ తిడుతూ తెగ కామెంట్లు జత చేశారు.
ఈ విషయంలో వివరణ ఇచ్చినప్పటికి కూడా తిట్లు ఆగలేదు. దీంతో కొంత కాలం ట్విట్టర్ కు దూరంగా ఉండాలని అనుకుంటున్నట్లు తెలిపాడు. ఇలా బ్రహ్మాజీ చేసిన కామెంట్ కు చాలా మంది స్పందించారు. బ్రహ్మాజీని ఏకిపారేశారు. దీంతో అతడు నైరాశ్యంలోకి వెళ్లిపోయాడు. అతడు చేసిన దానికి చాలా రెట్లు వారు కామెంట్లు చేయడం సంచలనంగా మారింది.
