Megastar Chiranjeevi : మెగాస్టార్ చిరంజీవి దేశంలోనే బిగ్గర్ దెన్ బచ్చన్ అని కొలువబడిన నటుడు. నాలుగు దశాబ్దాలైనా మెగాస్టార్ ప్రభ ఏమాత్రం తగ్గలేదు. చిరు అంటే ఇప్పుడు ఓ వ్యక్తి కాదు..ఆయనొక శక్తి అని చెప్పాలి. చిరంజీవి అంటే కోట్లాది అభిమానుల ఆరాధ్య నటుడే కాదు అంతకుమించి గొప్ప మానవతావాది. తెలుగు ఇండస్ట్రీలోనే కాదు ఇతర ఇండస్ట్రీలోనూ చిరు సాయం అందుకోని వారు లేరు.
ఎప్పుడు ఎవరికీ ఆపద వచ్చినా ఆదుకునే మొదటి వ్యక్తి చిరంజీవి. చేసిన సాయం చెప్పుకోవడం సభ్యత కాదు కాబట్టి ఆయన ఎప్పుడు చెప్పుకోరు. మీడియా ద్వారా అవే బయటకు వస్తుంటాయి. అలాగే ఆయన దగ్గర సాయం తీసుకున్నవారు చెప్పుకుంటే బయటకు వస్తాయి. తాజాగా నటుడు శివాజీ తనకు చిరంజీవి అందించిన ఆర్థిక సాయంపై ఓ ఇంటర్వ్యూలో చెప్పారు.
శివాజీ కమెడియన్ గా, నటుడిగా అందరికీ సుపరిచితుడే. మొన్నటి బిగ్ బాస్, 90’ఎస్ మిడిల్ క్లాస్ వెబ్ సిరీస్ ద్వారా గొప్పగా తన సెకండ్ ఇన్నింగ్స్ ప్రారంభించారు. ఇక శివాజీ చిరంజీవికి పెద్ద ఫ్యాన్ అనే విషయం అందరికీ తెలిసిందే. సమయం వచ్చినప్పుడల్లా చిరంజీవి గురించి ప్రస్తావిస్తూనే ఉంటారు. తాజాగా ఇంటర్వ్యూలో చిరు తనకు చేసిన సాయంపై మాట్లాడుతూ..‘‘మాస్టర్ సినిమా చేసేటప్పుడు ఆయనకు నేను ఓ అభిమానిగా, ఒక ఆర్టిస్టుగా మాత్రమే తెలుసు.
సినిమా షూటింగ్ ఫుల్ జోష్ గా జరుగుతోంది. అప్పుడు నా దగ్గర రూమ్ రెంట్ కట్టడానికి కూడా డబ్బులు లేవు. కొంచెం ఇబ్బంది పడుతున్నాను. నేను లేనప్పుడు ఈ విషయం ఎవరో చిరుకు చెప్పారట. ఓ రోజు షూటింగ్ అయ్యాక చిరంజీవి నా దగ్గరకు వచ్చి పదివేల రూపాయలు ఇచ్చారు. నేను ఎందుకు.. వద్దని అంటున్నా ఇచ్చారు. ఆ డబ్బులతో సంవత్సరం వరకు నాకు రెంట్ కు ఇబ్బంది కలుగకుండా చేశారు. అప్పటికీ నేను ఆయనకు అంతగా తెలియదు. ఆ సినిమాలోనే పరిచయం. చిన్న ఆర్టిస్టుని. అయినా నాకోసం ఆయన పదివేల రూపాయలు ఇచ్చారు.’’ అంటూ గుర్తుచేసుకున్నారు.
