Teenager Driving Case : టీనేజర్ డ్రైవింగ్ కేసులో నిందితుడి తాతను పోలీసులు అరెస్టు చేశారు. ఫుణె కారు ప్రమాదానికి కారకుడైన టీనేజర్ తాత సురేంద్ర అగర్వాల్ ను అత్యంత నాటకీయ పరిణామాల మధ్య పోలీసులు ఈరోజు ఉదయం ఆరెస్టు చేశారు.
ఈ కేసులో సురేంద్రను విచారణ కోసం పోలీసులు నిన్న పిలిచారు. రాత్రి వరకు విచారించారు. అయితే, డ్రైవర్ గంగారాంను ఇరికించే ప్రయత్నం సురేంద్ర చేసినట్లు పోలీసులు నిర్ధారించుకున్నారు. గంగారాంను బెదిరించి ప్రమాద సమయంలో తానే కారు నడిపినట్లు ఒప్పుకోవాలని సురేంద్ర ఒత్తిడి చేసినట్లు విచారణలో తేలింది. దీంతో కొత్త కేసు నమోదు చేసిన పుణె క్రైం బ్రాంచ్ ఈరోజు తెల్లవారుజామున 3 గంటల సమయంలో సురేంద్రను ఆయన నివాసంలోనే అరెస్టు చేసింది.
ప్రమాదానికి ముందు మైనర్ తన స్నేహితులతో కలిసి రెండు బార్లకు వెళ్లి మద్యం తాగినట్లు పోలీసులు గుర్తించారు. తిరిగి ఇంటికి వెళ్తుండగా బైక్ ను బలంగా ఢీకొట్టాడు. దీంతో బండిపై ఉన్న ఇద్దరు టెకీలు అక్కడికక్కడే ప్రాణాలు కోల్పోయారు. ఈ కేసులో నిందితుడి తండ్రి, రెండు బార్ల యజమానులను సైతం పోలీసులు ఇప్పటికే అరెస్టు చేశారు. అయితే ఈ కేసులో విధుల్లో నిర్లక్ష్యంగా వ్యవహరించారనే అభియోగాలపై ఇద్దరు అధికారులపైనా సస్పెన్షన్ వేటు పడింది.
