Foreign Dogs : ప్రమాదకర 25 రకాల విదేశీ జాతి కుక్కల దిగుమతిపై కేంద్రం విధించిన నిషేధంపై హైదరాబాద్ హైకోర్టు స్టే ఇచ్చింది. సమగ్ర వివరాలతో కౌంటర్లు దాఖలు చేయాలని కేంద్ర, రాష్ట్ర ప్రభుత్వాలకు నోటీసులు జారీ చేసింది. 25 రకాల విదేశీ జాతి కుక్కల దిగుమతి, బ్రీడింగ్, పెంపకం, విక్రయాలపై నిషేధం విధిస్తూ కేంద్ర పశుసంవర్ధక శాఖ గత మార్చి 12న సర్క్యులర్ జారీచేసింది.
దీనిని సవాలు చేస్తూ ఫరీదున్నీసా హుమా, ఈస్తర్ చౌదరితో పాటు మరో రెండు స్వచ్ఛంద సంస్థలు దాఖలు చేసిన పిటిషన్లపై హైకోర్టు శుక్రవారం విచారణ చేపట్టింది. శాస్త్రీయ ఆధారాలు లేకుండా కేంద్రం నిషేధ ఉత్తర్వులిచ్చిందని, ఇప్పటికే కర్నాటక, మద్రాస్, ఢిల్లీ హైకోర్టులు కేంద్ర సర్క్యులర్ అమలును నిలిపివేస్తూ ఉత్తర్వులిచ్చాయని పిటిషనర్ల తరపు లాయర్ వాదించారు. దీంతో కేంద్ర జారీ చేసిన సర్క్యులర్ పై కోర్టు మధ్యంతర ఉత్తర్వులిచ్చింది.