Indian Film Industry : సాధారణంగా వీకెండ్ ను సద్వినియోగం చేసుకునేందుకు సినిమాలను శుక్రవారం రిలీజ్ చేస్తారు మేకర్స్. కానీ ఈ రోజుల్లో కొన్ని భారీ బడ్జెట్ సినిమాలను మాత్రం వీకెండ్ కు ఒక రోజు ముందు అదనపు ప్రయోజనం పొందేందుకు గురువారం విడుదల చేయడాన్ని మనం చూస్తున్నాం. మరి కొన్ని నెలల్లో విడుదలకు సిద్ధంగా ఉన్న పలు చిత్రాలు కూడా చాలా వరకు గురువారమే ప్రేక్షకుల ముందుకు తీసుకువచ్చేందుకు మేకర్స్ సిద్ధం చేస్తున్నారు.
సౌత్ ఇండియాలో కమల్ హాసన్ హీరోగా తెరకెక్కుతున్న ‘ఇండియన్ 2’ మరికొన్ని రోజుల్లో విడుదల కాబోతోంది. జూన్ 17వ తేదీ (సోమవారం) బక్రీద్ సెలవును సద్వినియోగం చేసుకుంటూ జూన్ 13వ తేదీ (గురువారం) ప్రేక్షకుల ముందుకు తీసుకురానున్నారు. ప్రభాస్ తాజా చిత్రం ‘కల్కి 2898 ఏడీ’ జూన్ 27న ప్రేక్షకుల ముందుకు రానుంది. అయితే ఈ సినిమాకు లాంగ్ వీకెండ్ కానీ, హాలిడే అడ్వాంటేజ్ కానీ ఏమీ లేవు.
అల్లు అర్జున్ నటించిన ‘పుష్ప 2: ది రూల్’ ఆగస్ట్ 15 (గురువారం) ప్రపంచ వ్యాప్తంగా విడుదల కాబోతోంది. ఇండిపెండెన్స్ డే వీకెండ్ ను సద్వినియోగం చేసుకుంటుంది. పుష్ప 2 తర్వాత రెండు వారాల తర్వాత నాని నటించిన ‘సరిపోదా శనివారం’ ఆగస్టు 29న విడుదల కానుంది. ఈ సినిమాకు కూడా హాలిడే, లాంగ్ వీకెండ్ అడ్వాంటేజ్ ఏమీ లేదు.
ఎన్టీఆర్ ‘దేవర’ కూడా దసరా పండుగ సందర్భంగా అక్టోబర్ 10న ప్రపంచ వ్యాప్తంగా విడుదలవుతోంది. కొన్ని సినిమాలు వీకెండ్స్ ను క్యాష్ చేసుకోగా, మరికొన్ని హాలిడే షెడ్యూల్స్ తో సంబంధం లేకుండా గురువారాల్లో విడుదల చేయడానికి మొగ్గు చూపుతున్నాయి. ఈ ధోరణి త్వరలోనే భారతీయ చిత్ర పరిశ్రమలో ఒక ఆనవాయితీగా మారే అవకాశం కనిపిస్తోంది.