Vamu Churanam : ఆయుర్వేదంలో వాముకు ప్రత్యేక స్థానం ఉంటుంది. వీన్ని ఓమ అని కొన్ని ప్రాంతాల్లో పిలుస్తుంటారు. వంటింట్లో ఉండే ఈ దినుసుతో ఎన్నో రకాల ప్రయోజనాలు ఉన్నాయి. మంచి సువాసన ఉన్న ఇది జీర్ణ సమస్యలను దూరం చేస్తుంది. వామును వేడి నీటితో కలిపి తీసుకుంటే ఈ సమస్య పోతుంది. ఆహారం జీర్ణం చేయడంలో వాము సాయపడుతుంది. వామును కూరలు, పరోటాలు, రొట్టెలు, పకోడీలలో వేస్తే రుచిగా ఉంటుంది.
అజీర్తి సమస్య ఉన్న వారు వాము, ఉప్పు, మిరియాలు సమంగా తీసుకుని చూర్ణం చేసుకుని ప్రతిరోజు భోజనానికి ముందు తాగితే అజీర్ణం నుంచి విముక్తి పొందవచ్చు. వయసు మళ్లిన వారికి కీళ్లనొప్పులు తగ్గించుకోవడానికి నానా తంటాలు పడుతుంటారు. వాము కీళ్ల నొప్పులను నయం చేసే శక్తి కలిగి ఉంటుంది. వాము నూనెతో కీళ్లపై మర్దన చేస్తే కీళ్ల నొప్పుల నుంచి ఉపశమనం లభిస్తుంది.
గుండె జబ్బులకు కూడా వాము అడ్డుగా నిలుస్తుంది. జలుబు, తలనొప్పి వంటి జబ్బులకు వాము ఔషధంగా పనిచేస్తుంది. వాము పొడిని ఒక గుడ్డలో కట్టి మెల్లగా వాసన చూస్తే జలుబు సమస్య దూరం అవుతుంది. వాము మూత్ర కోశ వ్యాధులకు మందులా ఉపయోగపడుతుంది. వామును తరచుగా తీసుకుంటే మూత్ర పిండాల్లో రాళ్లు ఏర్పడినా అవి కరగడానికి దోహదపడుతుంది.
గర్భవతులు తరచు వాము తీసుకుంటే చాలా ప్రయోజనాలు దక్కుతాయి. వాము రక్తాన్ని శుభ్రం చేస్తుంది. శరీరంలో రక్తప్రసరణ సక్రమంగా సాగేలా చేస్తుంది. ఇలా వాము మన శరీరానికి ఎంతో మేలు చేస్తుంది. వేయించిన వాము, జీలకర్ర నీటిలో మరిగించి తాగితే ఎసిడిటి తగ్గుతుంది. వామును నీళ్లలో నానబెట్టి అందులో ఉప్పు వేసి నీరు తాగితే వాంతులకు మందులా పనిచేస్తుంది.
