![DC Vs LSG](https://jaiswaraajya.tv/wp-content/uploads/2024/05/dc-won.jpg)
DC Vs LSG : ఢిల్లీ క్యాపిటల్స్ తో అరుణ్ జైట్లీ స్టేడియంలో జరిగిన కీలక పోరులో లక్నో బ్యాటర్లు చేతులెత్తేశారు. దీంతో లక్నో కు ప్లే ఆప్ కు వెళ్లే అవకాశాలు పూర్తిగా మూసుకుపోయినట్లే. అయితే ఢిల్లీ క్యాపిటల్స్ బ్యాటర్లలో భీకరమైన ఫామ్ లో ఉన్న జేమ్స్ ప్రేజర్ ముగుర్క్ డకౌట్ కాగా.. అభిషేక్ పొరేల్ 33 బంతుల్లోనే 55 పరుగులు చేసి శభాష్ అనిపించుకున్నాడు. నాలుగు సిక్సులు, అయిదు ఫోర్లతో చెలరేగి ఆడాడు. చివర్లో ట్రిస్టన్ స్టబ్స్ కూడా సిక్సులతో విరుచుకుపడటంతో 25 బంతుల్లోనే 57 పరుగులు చేసి జట్టుకు 208 పరుగుల భారీ స్కోరును అందించాడు. లక్నో బౌలర్లలో నవీన్ ఉల్ హక్ ఒక్కడే రెండు వికెట్లు తీయగా.. 50 కి పైగా పరుగులు సమర్పించుకున్నాడు.
అనంతరం ఛేదనకు దిగిన లక్నో ఏ మాత్రం ప్రభావం చూపలేకపోయింది. రాహుల్, దీపక్ హుడా, మార్కస్ స్టోయినిస్ లాంటి అగ్రశ్రేణి బ్యాటర్లు సింగిల్ డిజిట్ కే పరిమితమయ్యారు. మిడిల్ ఓవర్లో నికోలస్ పూరన్, చివర్లో అర్షద్ ఖాన్ మెరుపులు మెరిపించినా చివరికి అవి అంతరాన్ని తగ్గించాయే తప్పా మ్యాచ్ ను గెలిపించలేకపోయాయి.
ఢిల్లీ బౌలర్లలో ఇషాంత్ శర్మ నాలుగు ఓవర్లు వేసి 33 పరుగులు ఇచ్చి మూడు వికెట్లు పడగొట్టాడు. మిగతా బౌలర్లు తలో వికెట్ తీసి ఢిల్లీని గెలిపించుకున్నారు. కానీ మిగతా ప్లేసులకు గట్టిపోటీ ఎదురవుతున్న సమయంలో ప్లే ఆప్ బెర్త్ దొరకడం కష్టమే.
ఇప్పటికే చెన్నై జట్టు 14 పాయింట్లతో పాటు నెట్ రన్ రేట్ మెరుగ్గా ఉంచుకుంది. ఆర్సీబీ తో మ్యాచ్ లో గనక గెలిస్తే చెన్నై నేరుగా ప్లే ఆప్స్ కు అర్హత సాధిస్తుంది. బెంగళూరు జట్టు అనూహ్యంగా అయిదు విజయాలు సాధించి ప్లే ఆప్ రేసులోకి వచ్చేసింది. ముఖ్యంగా చెన్నై పై గెలిస్తే టాప్ ఫోర్ ప్లేస్ లోకి వెళుతుంది. చెన్నై అవకాశాలు దెబ్బతింటాయి. సన్ రైజర్స్ గెలుపొటముల మీదనే మిగతా జట్ల ప్లే ఆప్ రేసులు కన్ ఫాం అయి ఉన్నాయి.