Nellore : వేగంగా ప్రయాణిస్తున్న ఓ కారును పెద్దపులి ఒక్కసారిగా ఢీకొట్టింది. ఊహించని ఈ పరిణామంతో కారులోని ప్రయాణికులు భయబ్రాంతులకు గురయ్యారు. నెల్లూరు-ముంబై జాతీయ రహదారిపై ప్రయాణిస్తున్న ఓ కారును పెద్దపులి ఢీకొట్టింది. బద్వేలుకు చెందిన వ్యక్తులు కారులో నెల్లూరు వెళ్తుండగా ఈ ఘటన జరిగింది. రోడ్డును దాటే క్రమంలో పెద్దపులి అటుగా వస్తున్న కారును ఢీకొట్టింది. ఈ ఘటనలో కారు పెద్దపులిని కొంతదూరం వరకు ఈడ్చుకెళ్లినట్లు ప్రత్యక్ష సాక్షులు తెలిపారు. పులి కాళ్లకు తీవ్ర గాయాలైనప్పటికీ అడవిలోకి పరుగులు తీసిందని అన్నారు. ఈ ప్రమాదంలో కారు ముందు భాగం ధ్యంసమైంది.
మర్రిపాడు మండలం పరిధిలో ఈ ఘటన చోటుచేసుకుంది. పెద్దపులి సంచరిస్తోందన్న వార్తతో మర్రిపాడు మండల వాసులు ఆందోళన చెందుతున్నారు. ఈ సమాచారం అందుకున్న అటవీశాఖ సిబ్బంది అక్కడికి చేరుకొని వివరాలు సేకరించారు. పెద్దపులి కోసం అటవీ ప్రాంతంలో కూంబింగ్ చేపడతామని వెల్లడించారు.
