Pawan Kalyan : ఏపీలో ఎన్నికల ప్రక్రియ ముగిసింది. ఎన్నికల ఫలితాలు కూడా వచ్చేయడంతో కొత్తగా ఎన్నికైన ప్రభుత్వం ఏర్పాటు చేసేందుకు సన్నాహాలు ముమ్మరంగా జరుగుతున్నాయి. ఆదివారం కేంద్రంలో నరేంద్రమోడీ ముచ్చటగా మూడోసారి ప్రధానిగా ప్రమాణ స్వీకారం చేశారు. ఆయనతో పాటు దాదాపు 30మందికి మంత్రులు కూడా ప్రమాణ స్వీకారం చేయడంతో ఓ చారిత్రాత్మక ఘట్టం ఆవిష్కృతమైంది. ఇక మిగిలింది ఏపీలో ప్రభుత్వ ఏర్పాటు. ఇప్పటికే చంద్రబాబు నాయుడు నేతృత్వంలో ఏర్పడే ప్రభుత్వం కోసం కేసరపల్లి ఐటీ పార్కులో ఏర్పాట్లు జరుగుతున్నాయి. ఈ క్రమంలో అందరి దృష్టి పవన్ కల్యాణ్ చేపట్టే పదవులపైనే పడింది. ఆయనకు ఫలానా పదవి కట్టబెడతారని భారీ చర్చ జరుగుతుంది. ఆ వివరాల్లోకి వెళితే.. ఏపీలో టీడీపీ, జనసేన, బీజేపీ కూటమి ఈ సారి ఎన్నికల్లో పోటీ చేసి తిరుగులేని విజయం సాధించింది. మొత్తం సీట్లలో 95 శాతం కొల్లగొట్టి విజయకేతనం ఎగురవేసింది. దాదాపు 175 స్థానాల్లో 164 సీట్లను గెలుచుకొని వైసీపీకి ప్రతిపక్ష హోదా దక్కకుండా చేసేసింది. దాంతో చంద్రబాబు ప్రభుత్వం జూన్ 12వ తేదీన కొలువు దీరేందుకు రెడీగా ఉంది.
అయితే ఏపీ ఎన్నికల గెలుపులో కీలక పాత్రను పోషించిన జనసేన, ఆ పార్టీ అధినేత పవన్ కల్యాణ్ ఇక మీదట ఎలాంటి వ్యూహాన్ని అమలు చేయబోతున్నారు. తమ పార్టీకి ఎన్ని మంత్రులు దక్కబోతున్నాయన్న విషయం పై రకరకాల ఊహగానాలు వెలువడుతున్నాయి. అయితే వాటిపై అధికారికంగా ఎలాంటి క్లారిటీ ఇంత వరకు రాలేదు. ఇక పవన్ కల్యాణ్ ఏ పదవి తీసుకొంటారనే విషయం తెలుగు రాష్ట్రాల్లో జోరుగా చర్చకు దారి తీసింది. అయితే ఆయన డిప్యూటీ సీఎంగా పదవి ప్రమాణం చేస్తారనే ఊహగానాలపై పార్టీ కూడా మౌనం పాటిస్తోంది. అయితే పదవుల పంపిణీకి.. కేంద్ర ప్రభుత్వ ప్రమాణ స్వీకారం, ఈనాడు సంస్థల అధినేత రామోజీ రావు మరణం కొంత బ్రేక్ వేశాయి. తాజా మీడియా కథనాల ప్రకారం.. పవన్ కల్యాణ్ రెండు కీలక బాధ్యతలను చేపట్టబోతున్నారని తెలుస్తోంది. డిప్యూటీ సీఎంగా, అలాగే హోం మంత్రిగా బాధ్యతలు చేపట్టేందుకు ఆయన సుముఖంగా ఉన్నట్టు తెలుస్తున్నది. అయితే చివరి నిమిషంలో పవన్ కళ్యాణ్ తీసుకొనే నిర్ణయం ప్రకారం మార్పులు చేర్పులు ఉంటాయని రాజకీయ విశ్లేషకులు భావిస్తున్నారు.