- ఈ రోజు విచారణకు రాలేనని లేఖ
MP Avinash : సీబీఐ విచారణకు అవినాష్ రెడ్డి డుమ్మా కొట్టారు. అత్యవసర పనులు ఉన్నందున మరో నాలుగు రోజులు అందుబాటులో ఉండనని చెప్పారు. హైదరాబాద్ నుంచి కడపకు బయల్దేరి వెళ్లినట్లుగా సమాచారం. నాలుగు రోజుల తర్వాత విచారణకు వస్తానని లేఖలో పేర్కొన్నట్లు తెలిసింది. అయితే విచారణకు రానని అవినాష్ లేఖను సీబీఐ సీరియస్ గా తీసుకున్నట్లు సమాచారం.. ఈరోజు అవినాష్ అరెస్ట్ ఉంటుందని అంతా భావిస్తున్న నేపథ్యంలో సీబీఐకి షాక్ ఇస్తూ అవినాష్ కడప బయల్దేరి వెళ్లినట్లు తెలుస్తున్నది. ఈమేరకు జూబ్లీహిల్స్ లోని తన నివాసం ముందు మీడియాతో మాట్లాడి వెళ్లినట్లు సమాచారం. మరోవైపు ఎంపీ అవినాష్ నివాసానికి పెద్ద సంఖ్యలో వైసీపీ కార్యకర్తలు చేరుకున్నారు. వారంతా అవినాష్ కు మద్దతుగా నినాదాలు చేశారు.
విచారణ ఎందుకంటే..
వివేకా హత్య కేసులో అవినాష్ (MP Avinash) పేరు ప్రధానంగా వినిపిస్తున్నది. 160 సీఆర్పీసీ కింద ఈ రోజు విచారణకు రావాలని ఆయనను సీబీఐ కోరింది. మరోవైపు ముందస్తు బెయిల్ కోసం అవినాష్ చేసిన పిటిషన్ ను హైకోర్టు తిరస్కరించింది. అయితే 20 రోజుల విరామం తర్వాత మరోసారి నోటీసులు అదజేయడం ఇక్కడ సంచలనంగా మారింది. ఇప్పటికే కడపలో అన్ని కార్యక్రమాలను రద్దు చేసుకున్న ఎంపీ అవినాష్ విచారణకు కూడా రాలేనని డుమ్మా కొట్టడం విస్మయానికి గురి చేస్తున్నది. ఇక సీబీఐ అడుగులు ఎలా ఉంటాయోనని అందరూ ఎదురు చూస్తున్నారు. సీబీఐ స్వయంగా రంగంలోకి దిగి అవినాష్ ను అదుపులోకి తీసుకుంటుందా.. మరోసారి విచారణకు రావాలని ఏదైనా తేదీ ఇస్తుందా వేచి చూడాల్సిందే.
